МызекIорэ мылъкум епхыгъэ зэзэ­гъы­ныгъэхэм ягъэпсын, анахьэу зыныбжь имыкъугъэхэр хэлажьэхэмэ, Iоф къызэрыкIоп, пшъэдэкIы­жьышхуи пылъ. Ащ фэшI мы лъэныкъом епхыгъэ упчIэ заулэ Росреестрэм къызэхефы.

— Унагъом псэупIэр ещэмэ, кIэлэцIыкIоу ащ исым ифитыныгъэхэр хэбзэгъэуцугъэм сыдэущтэу къыухъумэхэра?
— УФ-м и Граждан кодекс къызэрэщиIорэмкIэ, кIэлэцIыкIур зэрытхэгъэ унэр зыныбжь имыкъугъэхэм алъыплъэрэ къулыкъухэм фитыныгъэ къамытэу пщэн уфитэп. Ахэм, пстэумэ апэу, кIэлэцIыкIум псэукIэ амалэу иIэр нахь дэи мэхъумэ зэрагъашIэ. Ащ фэдэ къулыкъу­хэм фитыныгъэ къызатырэм ыуж ны-тыхэм унэр зэращэрэм епхыгъэ зэзэгъыныгъэр къыушыхьатынэу нотариусым зыфагъэзэн фае. ЕтIанэ зыныбжь имыкъугъэм псэупIэр къызэрэIахыгъэр, зыщэфыгъэм ар иунае зэрэ­хъугъэр Росреестрэм егъэпсы. ЛъэныкъуитIум яшIоигъоныгъэкIэ ащ епхыгъэ тхылъхэр нотариусыми электроннэ шIыкIэм тетэу ыгъа­хьынхэ ылъэкIыщт. Джащыгъум ахэр зы мафэкIэ регистрацие ашIых.
— КIэлэцIыкIум ыныбжь епхыгъа зэзэгъыныгъэм игъэпсын?
— Унагъом зыныбжь илъэс 14-м нэмысыгъэу ис сабыим ыцIэкIэ лъэIу тхылъыр зы­тырэр, IэпэкIадзэр кIэзгъэуцорэр ны-тыхэр е нэмыкIэу лъыплъэхэрэр ары. КIэлэцIыкIур къызэрэхъугъэр къэзыушыхьатырэ тхылъыри (свидетельство о рождении) ащ гуалъхьэн фае.
Зыныбжь илъэс 14-м ехъугъэу, ау 18-м шIомыкIыгъэхэм лъэIу тхылъхэр ежьхэм атых ыкIи кIэтхэжьых, ау зэзэгъыныгъэм зыныбжь имыкъугъэми нахьыжъэу игъусэми яIэпэкIа­дзэ кIэтын фае. Мыщ дэжьми кIэлэцIыкIур къызэ­рэхъугъэр къэзыушыхьатырэ тхылъыр ищыкIагъ.
— ЩымыIэжьым къыкIэныгъэр зыныбжь имыкъугъэм къыфэнагъэмэ, ащкIэ фитыныгъэу иIэхэр зэригъэпсыщтхэм хэушъхьафыкIыгъэу шапхъэхэр пылъха?
— ЩымыIэжьым къыкIэныгъэр къызфэнагъэм ыныбжь илъэс 14-м нэмысыгъэмэ, ащ ыцIэкIэ ар ны-тыхэм е нэмыкIэу лъыплъэхэрэм аштэ. Илъэс 14-м зыныбжь ехъугъэу, ау 18-м шIомыкIыгъэхэм нахьыжъхэм яшIэ хэлъэу ежьхэм агъэпсы. ЩымыIэжьым къыкIэныгъэр зыныбжь имыкъугъэм къыфэнагъэу ыштэжьыщтмэ, кIэлэцIыкIухэм алъыплъэрэ къулыкъу­хэм фитыныгъэ къатын ищыкIагъэп.