ПсэупIэ е нэмыкIэу амыгъэкощырэ мылъкум хэхьэрэ псэуалъэ къэзыщэфыхэрэм е зыщэхэрэм зэзэгъыныгъэр электроннэ шIыкIэм тетэу агъэ­псы­шъунэу зэрэхъугъэм уахътэу ыкIи кIуачIэу ащ тырагъэкIуадэрэр нахь макIэ къешIы.

Республикэм щыпсэухэрэм ащ фэдэ шIыкIэр агъэфедэзэ тхылъхэр Росреестрэм ратынхэу непэ амал яI.
— Илъэс къэс амыгъэкощырэ мылъкум епхыгъэ зэзэгъыныгъэхэр электроннэ шIыкIэм тетэу зэдагъэпсынхэр нахьыбэу агъэфедэ мэ­хъу. ЦIыфхэм яуахътэ нахь агъэлъапIэ хъу­гъэ, арышъ, пэIудзыгъэ шIыкIэм тетэу тхылъхэр гъэпсыгъэнхэр зигъо Iофэу щыт, — къыкIи­гъэтхъыгъ Росреестрэм АР-мкIэ и ГъэIоры­шIапIэ ипащэу Марина Никифоровам.
Ащ фэдэ тхылъхэр Росреестрэм ипортал иедзыгъоу «Электронные услуги и сервис» зыфиIорэм щыптынхэ плъэкIыщт, ау… Электроннэ IэпэкIадзэ иIэу атыгъэ лъэIу тхылъым къыпкъырыкIхэзэ амыгъэкощырэ мылъкур зиунаер зэблахъуным пае, электроннэ регист­рациер ашIынэу фитыныгъэ зэряIэр ЗыкI къэралыгъо реестрэм итхэгъэн фае.
Амыгъэкощырэ мылъкум хэхьэрэ псэуа­лъэхэм алъэныкъокIэ гъэпцIакIохэм бзэджэшIагъэхэр зэрамыхьанхэм фэшI ащ фэдэ шапхъэхэр щыIэ хъугъэ. Арышъ, электроннэ IэпэкIадзэр ыгъэфедэзэ зэзэгъыныгъэр зы­гъэпсымэ зышIоигъохэм ыпэрапшIэу Росреестрэр ащ щагъэгъозэн фае. Ащ фэгъэхьыгъэ лъэIу тхылъыр тхьапэм тетыныр, амыгъэкощырэ мылъкур зиунаер кIэтхэжьыгъэныр шIокI зимыIэ Iоф.
Мы лъэIу тхылъыр къэралыгъо ыкIи муниципальнэ фэIо-фашIэхэр зыщагъэцакIэхэрэ Гупчэм щыптын плъэкIыщт. ЦIыфым амыгъэкощырэ мылъкум хэхьэрэ псэолъэ заулэ иIэмэ, ащ пэпчъ епхыгъэу ар ытын фит. Росреестрэм и ГъэIорышIапIэ лъэIу тхылъхэр IэкIахьэхэмэ, псэуалъэм епхыгъэ зэзэгъыныгъэр электроннэ шIыкIэм тетэу ыгъэпсынэу фитыныгъэ зэриIэр реестрэм щигъэнэфэщт. Ащ фэдэ тхыгъэ имытымэ, зэзэгъыныгъэм пае элект­роннэ шIыкIэм тетэу атыгъэ тхылъхэм ахэмыплъэу къызэкIигъэкIожьыщт.