Хэбзэгъэуцугъэу непэ щыIэм къызэ­рэдэлъытагъэмкIэ, анахьэу къагъэ­гъунэрэ чIыопс чIыпIэхэр амыгъэкощырэ мылъкум и ЗыкI къэралыгъо реестрэ хэгъэхьэгъэнхэ фае.

— ЧIыпIэм игъунапкъэхэр гъэнэфагъэхэу ыкIи ЗыкI къэралыгъо реестрэм хэгъэхьа­гъэхэмэ ащ ичIыопс щыIакIэ мыукъогъэнымкIэ, къыщыкIыхэрэм, псэушъхьэу хэсхэм зы­парэми иягъэ аримыгъэкIынымкIэ ишIуагъэ къэ­кIощт, — къыхигъэщыгъ Росреестрэм и ГъэIорышIапIэу АР-м щыIэм ипащэу Марина Никифоровам.
Анахьэу къагъэгъунэрэ чIыопс чIыпIэу щы­Iэхэм япроцент 80-р амыгъэкощырэ мылъкум и ЗыкI къэралыгъо реестрэ хэт. Адыгеим ащ фэдэ 20 иI. Ахэм ащыщэу федеральнэ мэхьанэ зиIэ чIыпIи 2-р, шъолъыр мэхьанэ зиIэ 18-м щыщэу 14-р ЗыкI реестрэм щытхыгъэх.
Анахьэу къагъэгъунэрэ чIыопс чIыпIэхэм ахэхьэх чIыгоу, псышъхьашъоу научнэ, культурнэ, рекреационнэ ыкIи чIыопскъэгъэгъунэн хэушъхьафыкIыгъэ мэхьанэ зиIэ, итеплъэкIэ шъолъырыр къэзгъэдахэрэ, цIыфым ипсауныгъэкIэ шIуагъэ къэзытырэ чIыопс комплекс е псэуалъэ зытетхэр. ХабзэмкIэ, ащ фэдэ чIыпIэхэр е ахэм ащыщ Iахьхэр, анахьэу къызэрагъэгъунэхэрэм къыхэкIэу, хъызмэтшIэным фэгъэзагъэхэм къахэхыжьыгъэх.
Анахьэу къагъэгъунэрэ чIыопс чIыпIэр ЗыкI къэралыгъо реестрэм хэгъэхьэгъэным пае къэралыгъо хэбзэ ыкIи чIыпIэ зыгъэIоры­шIэжьыпIэ къулыкъухэм тхылъхэр атынхэ фае. Ар ахэм япшъэрылъ гъэнэфагъэхэм ахэхьэ.
— Анахьэу къагъэгъунэрэ чIыопс чIыпIэ гъэпсыгъэныр чIыопсым икъэухъумэнкIэ шIуа­гъэ къэзытырэ IофшIэнхэм ащыщ. Ащ фэдэхэр экологическэ зекIоным изегъэушъомбгъун фэIорышIэх. Адыгеим мы зекIон лъэпкъыр илъэс къэс нахьыбэу щагъэфедэ мэхъу, — къыIуагъ Роскадастрэм икъутамэу АР-м щыIэм ипащэу ХъокIо Аюбэ.
Анахьэу къагъэгъунэрэ чIыопс чIыпIэхэм якъэбар Публичнэ кадастровэ картэм ит. Ащ иедзыгъоу «Зоны и территории» зыфиIорэм уихьэмэ чIыпIэм ыцIи, номерэу зэратхыгъэри ибгъотэщтых.