Мы мафэхэм Адыгэ къэралыгъо университетым нэбгыри 100 фэдизмэ химиемкIэ диктант щатхыгъ.

Естественнэ шIэ­ныгъэхэм ямэхьанэ къэIэтыгъэныр ары пшъэрылъ шъхьаIэу Iофтхьабзэм иIагъэр.
ЗэхэщакIохэм къызэраIуагъэмкIэ, гъэрекIо егъэпшагъэмэ, мыгъэ хэлэ­жьагъэр фэдитIукIэ нахьыб. КIэлэеджа­кIохэм, студентхэм, кIэлэегъаджэхэм химиемкIэ заушэтыгъ.
Урысые Федерацием просвещениемкIэ и Министерствэ, Москва къэ­ралыгъо университетэу М. В. Ломоносовым ыцIэ зыхьырэм тхылъ тедзапIэу «Просвещение» зыфиIорэм хэхьэрэ кIэлэегъаджэхэм я Ассоциацие ягукъэкIыкIэ мы Iофтхьабзэр илъэс пчъагъэ хъугъэу зэхащэ. Дунэе мэхьанэ ащ иIэ хъугъэ. Диктантыр зыщатхырэ чIыпIэм къемыкIолIэшъугъэхэм пэIудзыгъэ шIыкIэм тетэу заушэ­тыгъ.
ТихэгъэгукIэ анахь мэхьанэшхо зиIэ мэфэкIэу ТекIоныгъэр къызыдахыгъэр илъэс 80 зэрэхъугъэм ар фагъэхьы­гъагъ. Хэгъэгу зэошхом илъэхъан пыим ебэныгъэнымкIэ химикхэм яшIуагъэ къызэрагъакIощтыгъэр IофшIэным щыпхырыщыгъ.
Диктантым хэлэжьагъэхэм такъикъ 45-м къыкIоцI упчIэ 20-мэ джэуапхэр къаратыжьыгъэх. ИгъэкIотыгъэу мы предметыр пшIэн ищыкIэгъагъэп, щыIэныгъэм епхыгъэ гупшысэхэр ары анахь шъхьэIагъэхэр. Зэфэхьысыжьхэр жъоныгъуакIэм и 28-м къаIожьыщтых, пэ­Iудзыгъэ шIыкIэмкIэ зытхыгъэхэм яунэе кабинетхэм къафэкIожьыщт.
Адыгэ къэралыгъо университетым ипресс-къулыкъу.