Федеральнэ проектэу «Къэлэ щыIэкIэ Iэрыфэгъур» зыфи­Iорэм къыдыхэлъытагъэу зэтырагъэпсыхьащт чIыпIэ­хэмкIэ мэкъэтыныр аухынымкIэ къэнагъэр мэфэ 22-рэ, мэкъуогъум и 12-м нэс чIыпIэхэм якъыхэхын кIощт.

Лъэпкъ проектэу «ЩыIэныгъэм пае инфраструктурэр» зыфиIорэм тегъэ­псыхьагъэу зэнэкъокъур кIощт. Пшъэ­рылъ шъхьаIэу ащ иIэр нэбгырэ мин 20-м ехъу зыщыпсэурэ цIыф псэу­пIэ­хэм хэхъоныгъэ ягъэшIыгъэныр ары.
Адыгэ РеспубликэмкIэ муниципалитети 3-мэ — къалэу Мыекъуапэ, къэлэгъэпсыкIэ зиIэ псэупIэхэу Инэм­рэ Яблоновскэмрэ общественнэ чIы­пIэхэу ащызэтырагъэпсыхьащтхэр къыхахынхэу къапыщылъ. Республи­кэм икъэлэ шъхьаIэкIэ къыхахынхэу къахалъхьагъэхэр чIыпIи 3, ИнэмкIэ — 2, ЯблоновскэмкIэ — 4.
2017-рэ илъэсым программэр аублагъ, ар зыфытегъэпсыхьагъэр зэрэ Урысыеу яцIыф псэупIэхэм щыIакIэу адэлъыр нахьышIу шIыгъэ­ныр ары. ЦIыфэу ахэм ащыпсэухэрэм яеплъыкIэхэр къыдалъытэхэзэ, зэтегъэпсыхьан IофшIэнхэм афыряIэщт екIолIакIэхэр агъэнафэх. Нахь шIогъэ ин къытэу IофшIэнхэр зэшIохыгъэнхэм иамал ащ къытыщт, зэкIэми апэу гъэпсэфыпIэ, общественнэ чIыпIэхэр ары агъэкIэжьыщтхэр.
Адыгеим и ЛIышъхьэу КъумпIыл Мурат къызэрэхигъэщыгъэмкIэ, рес­публикэм имуниципалитет пстэуми илъэс къэс щагу ыкIи общественнэ чIыпIэ пшIы пчъагъэ ащызэтырагъэ­псыхьэ. 2019-рэ илъэсым къыщегъэ­жьагъэу щагу 204-рэ ыкIи общественнэ чIыпIэ 97-рэ зэтырагъэпсыхьагъ. Ахэм ащыщэу 2024-рэ илъэсым игъэкIотыгъэу Iофтхьабзэхэр зыщызэрахьагъэхэр щагу 31-рэ ыкIи общественнэ чIыпIи 8-рэ.
«Федеральнэ проектым зэрэхэла­жьэхэрэм амал къытыщт цIыф псэупIэ инхэм адэсхэм ыкIи яхьакIэхэм загъэпсэфынымкIэ джырэ уахътэм диштэу чIыпIэхэр агъэкIэрэкIэнхэу. Адыгеим ис цIыфхэри а Iофым хэлэжьэнхэм мэхьанэшхо иI. Тызэгъу­сэмэ ары тигупсэ республикэ нахь дахэу, къабзэу, зекIохэми нахь зыкъыфакъудыеу, Iэрыфэгъоу тшIын зытлъэкIыщтыр», — къыIуагъ Адыге­им и ЛIышъхьэу КъумпIыл Мурат.
Мыекъуапэ щыпсэухэрэм ыкIи къэлэ псэупIэ инитIум адэсхэм платформэу «Къэралыгъо фэIо-фашIэхэр» зыфиIорэмкIэ амакъэ атын алъэ­кIыщт. Федеральнэ проектым къыдыхэлъытагъэу зэтегъэпсыхьан IофшIэнхэмкIэ щысэу къэбгъэлъэгъон плъэкIыщт «Бульвар Победы» зыфиIорэр зэрэзэ­тырагъэпсыхьагъэр. 2023-рэ илъэсым кIогъэ мэкъэтыным проектым текIоныгъэр къыщыдихыгъ ыкIи 2024-м ар гъэцэкIагъэ хъугъэ. Республикэ ыкIи муниципальнэ бюджетхэм къахагъэкIи сомэ миллиони 163-рэ ахэм апэIуагъэхьагъ.
Жъы хъугъэ асфальтым ычIыпIэкIэ плиткэхэр мыщ щагъэтIылъыгъэх, уц къашхъом псыр тезыкIэщтыр, тIысыпIэ Iэрыфэгъухэр, урамхэр къэзгъэнэ­фыщтхэр агъэуцугъэх. Ащ нэмыкIэу псэолъэшIхэм къэзгъэнэфырэ пкъыгъохэм къялэлэхыщтыгъэ гъучIычхэр Iуахыгъэх, джыри нахь зэтегъэпсыхьагъэ хъуным пае кIэ горэхэри хагъэ­хьагъэх. Непэ Мыекъуапэ дэсхэм ыкIи ихьакIэхэм зызщагъэпсэфын алъэкIыщт анахь чIыпIэ шъхьаIэу ар хъугъэ.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.