Аужырэ одыджын
Непэ республикэм ит гурыт еджапIэхэм, гимназиехэм, лицейхэм аужырэ одыджыныр непэ къащытео.
Уахътэр шIэхэу кIуагъэ, илъэс 11-кIэ узэкIэIэбэжьымэ янэ-ятэхэм аIапэ аIыгъэу къащэгъэгъэ кIэлэцIыкIухэм джы гурыт еджапIэр къызэранэкIы, ящыIэныгъэ гъогу техьэх. АдыгеимкIэ аужырэ одыджыныр непэ нэбгырэ 1821-мэ къафытео. Ахэм ащыщэу 233-мэ а I-рэ шъуашэ зиIэ медалыр, нэбгырэ
190-мэ я II-рэ шъуашэ зиIэр къалэжьынхэм фэкIох, зыкI къэралыгъо ушэтынхэм язэфэхьысыжьхэм ар ялъытыгъэщт. Я 9-рэ классыр нэбгырэ 6143-мэ къаухыщт. Ахэм ащыщыбэм гурыт сэнэхьат зэрагъэгъотынэу училищхэм, колледжхэм ачIэхьащтых. Я 11-рэ классыр къэзыухын гухэлъ зиIэу ахэтыри макIэп.
ЗыкI къэралыгъо ушэтынхэм ятын аублэгъах. ЖъоныгъуакIэм и 23-м нэбгырэ 702-мэ тарихъымкIэ, литературэмкIэ, химиемкIэ заушэтыгъ. Ахэм ащыщэу химиер — нэбгырэ 308-мэ, тарихъыр — 303-мэ, литературэр — 91-мэ атыгъ. ШIокI зимыIэ ушэтынэу хьисапыр жъоныгъуакIэм и 27-м, урысыбзэр и 30-м атыщтых.
Ушэтынхэм апхырыкIынхэу къызпыщылъ кIэлэеджакIохэм, ахэр зыгъэхьазырыгъэ кIэлэегъаджэхэм ыкIи ны-тыхэм АР-м и ЛIышъхьэу КъумпIыл Мурат исоциальнэ хъытыухэмкIэ къафэгушIуагъ:
— Мы зыкI къэралыгъо ушэтыным ишIуагъэкIэ шIэныгъэу шъуIэкIэлъхэр къэжъугъэлъэгъон шъулъэкIыщт. Неущрэ мафэм ипчъэхэр мыщ къышъуфызэIуехых, университетым шъучIэхьан, шъугукIэ шъузыфэе сэнэхьатыр къыхэшъухын амал къышъуеты ыкIи гухэлъэу шъуиIэхэр къыжъудэхъунхэмкIэ апэрэ лъэбэкъоу щыт. ШIэныгъэ куухэр зэрэшъуиIэхэр, ушэтынхэр зэрифэшъуашэу зэрэшъутыщтхэм сицыхьэ телъ. Арышъ, ыпэкIэ шъулъыкIуат, шъуигухэлъхэм шъуафакIу.
ДЕЛЭКЪО Анет.