Урысые предпринимательствэм и Мафэу къэ­кIорэ блыпэм хагъэунэфыкIыщтым ипэгъокIэу гущыIэгъу тыфэхъугъ бизнесым IэпыIэгъу етыгъэнымкIэ АР-м и Фонд игъэцэкIэкIо пащэу Кобл Азэмат.
ИлъэсипшIэу къулыкъур зыщыIэм IэпыIэгъоу атыгъэр зы­фэдизым, анахьэу анаIэ зытетхэм ар къатегущыIагъ.
— Фондым пшъэрылъ шъхьа­Iэу иIэр чIыфэ цIыкIухэр (микро­займ) предпринимательхэм ари­­тызэ, IэпыIэгъу афэхъуныр ары. Ащ тетэу бизнес цIыкIум ыкIи гурытым фэгъэзагъэхэм япчъагъэ нахьыбэ шIыгъэныр стратегическэ гухэлъэу тиI, — къеIуатэ ащ. — ГущыIэм пае, блэкIыгъэ илъэсым Фондым иIэпыIэгъу Адыгеим ипредприниматель 205-мэ агъэфедагъ. Ахэм «микрозаймэу» яттыгъэр зэкIэмкIи сомэ миллион 534-рэ мин 820-рэ мэхъу. Мы предпринимательхэм ащыщэу нэбгыри 136-мэ, ар процент 66-рэ мэхъу, апэрэу Фондым зыкъыфагъэ­загъ.
Ахъщэ чIыфэу аштагъэм ишIуа­гъэкIэ ащыщхэм заушъомбгъуи, IофшIэпIэ чIыпIэхэр, пстэумкIи 80, къатыгъ, адрэхэм яIофхэр зэтырагъэуцожьыхи, чIыпIэ 770-рэ къызэтегъэнагъэ хъугъэ. Ащ къеушыхьаты Фондым иIэпыIэгъу шIуагъэ къызэритырэр.

Къыхэзгъэщымэ сшIоигъу УФ-м тэщ фэдэ «микрофинанс» организации 139-у итым яIоф­шIэн зызэрагъапшэм, Адыгеим и Фонд я 26-рэ чIыпIэр зэриубы­тыгъэр. Непэ Фондым имылъку сомэ миллиардрэ миллион 205-м ехъу.
— Сыд фэдиза предпринимательхэм анахьыбэу чIыфэу шъуIахын алъэ­кIыщтыр?
— Федеральнэ хэбзэгъэуцугъэм къызэрэдэлъытагъэмкIэ, Фондым «микрозайм» анахьыбэу ытырэр сомэ миллиони 5 мэхъу, анахь макIэр сомэ мин 50. Зэ­зэгъыныгъэу лъэныкъуитIум зэ­дашIырэм чIыфэр къызщатыжьын фэе пIалъэу итыр мэзи 3-м щегъэжьагъэу мэзэ 36-м нэс. «Микрозайм» зэфэшъхьаф 12 щыI, предпринимателым иIоф­шIэн, гъотэу иIэм, иамалхэм тыдяплъызэ ащыщэу къекIущтыр фэтэгъэпсы, чIыфэу ыштагъэм процентэу илъэсым техъощтыри ащ елъытыгъ, ар 7-м щегъэжьагъэу 19-м нэсы.

— Мы илъэсым игъэт­хэпэ мазэ бизнесым IэпыIэгъу етыгъэнымкIэ АР-м и Фонд пэщэ Iэна­тIэр зыщыпIыгъыр илъэ­сипшI зэрэхъугъэм тыщыгъуаз. А уахътэр къызэфэпхьысыжьмэ…
— Илъэси 10-м Фондым «мик­розайм» 1522-рэ пстэумкIи ыгъэ­псыгъ. АхъщэкIэ къэпIон хъумэ, ар сомэ миллиарди 2-рэ милли­он 950,1-рэ мэхъу. Фондым испе­циалистхэр предприни­матель 4367-мэ упчIэжьэгъу афэ­хъугъэх, бизнесым изэхэщэн, илъыгъэ­кIотэн, нэмыкIэу ащ еп­хы­гъэхэм афэгъэхьыгъэ зэIукIэгъухэр мы­зэу, мытIоу афызэ­хащэх.
УФ-м и Президент кIэщакIо зыфэхъугъэ лъэпкъ проектхэм ащыщэу «Бизнес цIыкIур ыкIи гурытыр, предпринимательхэм кIэщакIо зыфэхъугъэхэр пхыращынхэм фэшI IэпыIэгъу яты­гъэныр» зыфиIорэм игъэцэкIэн Фондыр чанэу хэлэжьагъ.
Къыхэзгъэщымэ сшIоигъор предпринимательхэм «микрозаймыр» къызIэкIэгъэхьэгъошIу афэхъуным лъэшэу тызэрэпы­лъыр ары. ЧIыфэу аштэрэм процентхэр макIэу зэрэтедгъа­хъорэм изакъоп зигугъу сшIырэр. Апэрэ такъикъэу предпринимателыр къызытэуалIэгъэм къы­щегъэжьагъэу, ахъщэр исчет ехьэ­фэкIэ тиспециалистхэм ащ зэпхыныгъэ дыряI, тхылъхэм ягъэпсынкIи, нэмыкI Iофэу къы­пыкIыхэрэмкIи IэпыIэгъу фэхъух. Ахъщэр заштэрэ ужыми яIофшIэн тылъэплъэ, чIыфэр игъом къытыжьышъуным тынаIэ тет. Арэущтэу щымытымэ хъущтэп, нэмыкIхэми IэпыIэгъу ящыкIагъ, ыпэкIэ зыштагъэм ипшъэрылъхэр ымыгъэцакIэхэмэ ахэм яттын къытIэкIэхьажьыщтэп.
Шъыпкъэ, предпринимательхэр зэрэгугъагъэхэу къычIэмыкIыжьэу мэхъу. Сомэ мил­лиони 5-р ягухэлъхэр пхыра­щынхэмкIэ имыкъуныр гъэ­шIэгъонэп, ар къызщитыжьын фэе илъэси 3 пIалъэу пылъыри макIэ, ау, гу­хэкIыми, ахэр тэ дгъэуцугъэ шап­хъэхэп, амалэу тиIэмкIэ Iоф­хэр къафэ­псыкIэнхэм тыпылъ.

Илъэси 10-р къызэфэсхьысыжьзэ, теубытагъэ хэлъэу къэс­Iон слъэкIыщт Фондым иIофшIэн шэпхъэ гъэнэфагъэхэм атетэу, дэх имыIэу, зэгъэфагъэу зэрэзэхэщагъэр, опыт ин зиIэ командэ зэрэщыла­жьэ­рэр, предпринимательхэм цыхьэ къызэрафашIырэр.
— Урысые предпринимательствэм и Мафэ ипэгъокIэу мы лъэныкъом фэгъэзагъэхэм сыд къяпIощта?
— Лъытэныгъэ зыфэтшIырэ типредпринимательхэр! Тыгу къыддеIэу шъуисэнэхьат мэфэкIкIэ тышъуфэгушIо. Бизнес зэхищэныр ыкIи гъэхъагъэхэр ышIызэ лъигъэкIотэныр зэпстэуми къадэхъурэп. Ащ IэпэIэсэ­ныгъэшхуи, щыIагъи, чаныгъи ищыкIагъэх, кIэу зыгорэ къэу­угупшысышъун, ар пхырыпщы­шъун фае. А зэпстэур зыхэлъхэм шъхьэкIэфэныгъэр къызэралэ­жьырэм Iо хэлъэп.
ШъуиIофшIэнкIэ тишъолъыр иэкономикэ хэхъоныгъэхэр ешъо­гъэшIых, бэдзэршIыпIэм товарэу, фэIо-фашIэу илъым хэшъогъахъо, IофшIэпIэ чIыпIэ­хэр къэшъотых, хэбзэIахьхэр бюджетым хэшъолъхьэх, шIушIэ IэпыIэгъури зыщыжъугъэгъуп­шэрэп.
Шъуигухэлъхэр къыжъудэ­хъунхэу, кIэщакIо шъузыфэхъу­хэрэр пхырышъущынхэ шъулъэ­кIынэу, цыхьэ зыфэшъушIын IофшIэгъухэм шъуащымыкIэнэу, псауныгъэ пытэ, щыIэкIэшIу, на­сып шъуиIэнэу, шъуибизнес шъузэрэщыгугъэу къыкIэкIонэу сышъуфэлъаIо!
Зыгъэхьазырыгъэр
ХЪУТ Нэфсэт.