Адыгэ къэралыгъо университетым лъэпкъ журналистикэм пае студентхэр ыгъэхьазырынэу ыублэщт. ИлъэсыкIэ еджэгъум лъэныкъоу «Филологиер. Прикладной филологиер: адыгабзэр ыкIи литературэр, журналистикэр» зыфиIорэм къыдыхэлъытагъэу бюджет чIыпIи 10 щыIэ хъущт.
ИлъэсиплI программэм къыдыхэлъытагъэу филолог-бакалаврхэм адыгабзэмкIэ, литературэмкIэ, журналистикэмкIэ шIэныгъэхэр арагъэгъотыщт, адыгабзэкIэ Iоф зышIэрэ къэбар жъугъэм иамалхэм ащылэжьэнхэ алъэкIыщт. Адыгэ филологием икафедрэ КъТРК-у «Адыгея» зыфиIорэмрэ республикэ гъэзетэу «Адыгэ макъэмрэ» яIэпыIэгъоу журналистхэр агъэхьазырыщтых.
— Программэм къыдыхэлъытагъэу теоретическэ ыкIи практическэ лъэныкъохэмкIэ студентхэм Iоф адашIэщт. Ащ шIуагъэ пылъ, зы лъэныкъомкIэ студентхэм адыгабзэмкIэ шIэныгъэ куухэр агъотыщтых, ятIонэрэмкIэ шъолъыр журналистикэм хэшIыкI ин фыряIэщт. Егъэджэнхэр университетым икIэлэегъаджэхэм анэмыкIэу зэлъа­шIэрэ журналистхэм афызэхащэщтых, — къыIуагъ адыгэ филологиемрэ культурэмрэкIэ факультетым идеканэу Ахъмэт Джульетэ.
Урысые Федерацием бзэ ыкIи диалект 270-рэ щагъэфедэ. Ахэм якъызэтегъэ­нэжьынкIэ лъэпкъ журналистикэм мэхьанэшхо иI, ау лэжьэн цIыфхэр зэримыкъухэрэр гумэкIыгъо шъхьаIэу щыт. Адыгабзэм изэгъэшIэнкIэ лъэпкъ факультетым IофшIэгъэ инхэр иIэх, ахэм ащыщ илъэс пчъагъэ хъугъэу зэхащэрэ «Адыгэ диктантыр», джащ фэдэу аужырэ илъэсхэм гъэмафэм кIэлэеджакIохэм бзэ еджапIэу «Адыглэнд» зыфиIорэр афызэхащэ, ащ нэмыкIэу Адыгеим итарихъ-культурнэ ландшафт игъэкIэжьынкIэ мастерской къызэIуахыгъ. Ахэм яшIуагъэкIэ адыгабзэм имэхьанэ ныбжьыкIэхэм нахь зэхашIэ, адыгэ культурэм фэщагъэ мэхъух.
Лъэпкъ журналистикэм ныбжьыкIэхэр фэгъэхьазырыгъэнхэмкIэ IэпыIэгъу афэ­хъуным журналист сообществэр, гурыт еджапIэхэм яапшъэрэ классхэм аще­джэхэрэм гущыIэгъу афэхъуным Адыгеим ижурналистхэм я Союз фэхьазырых.
— Журналистикэр шIу ягъэлъэгъугъэн фае. Ар хэта зышIэн зылъэ­кIыщтыр? Илъэс пчъагъэрэ мы сэнэхьатым фэлажьэу, гъэхъагъэхэр зиIэхэр ары. НыбжьыкIэхэм ащ щысэ тырахын фае, — еIо Адыгеим ижурналистхэм я Союз ипащэу, АР-м изаслуженнэ журналистэу ТIэшъу Светланэ.
Лъэпкъ журналистикэм фэгъэхьыгъэ еджапIэ Адыгеим къыщызэIуахыным епхыгъэ проектыр республикэ грантым хэлажьэ. Ягухэлъхэр къадэхъунхэу мэгугъэх.