Адыгэ республикэ клиническэ онкологическэ диспан­серэу М. Хъ. Iэшъхьэмафэм ыцIэкIэ щытым игъэкIотыгъэ гъэцэкIэжьынхэр рашIылIэнхэу къаунэкIыгъ ыкIи нахь зырагъэушъомбгъуным фэшI зы къат ыкIыIу тырашIыхьащт.

НепэкIэ IэзапIэр зыдэкощыгъэр, IофшIэнэу рашIы­лIэщтхэр «Адыгэ макъэм» къы­фиIотагъ республикэ онколо­гическэ диспансерым иврач шъхьаIэу АкIэгъу Заур.
IэзапIэр зычIэт унэу илъэс 50-м ехъукIэ узэкIэIэбэжьмэ ашIыгъэм мыщ фэдэ игъэкIо­тыгъэ гъэцэкIэжьынхэр ешIылIэгъэнхэм иIофыгъо бэшIагъэ къызыуцугъагъэр.
— Медицинэ учреждениехэм ягъэкIэжьын фытегъэпсы­хьэгъэ федеральнэ проектэу «Псауныгъэм икъэухъумэнкIэ инфраструктурэм ихэхъоныгъ» зыфиIорэм онкодис­пансерыр хэгъэхьэгъэнымкIэ унашъор зы­щаштагъэр АР-м и ЛIышъхьэу КъумпIыл Мурат УФ-м и Президентэу Владимир Путиным зыIокIэр ары. Ащ ишIуагъэкIэ IэзапIэм игъэцэ­кIэ­жьын пэIу­хьащт сомэ миллион 730-рэ фэдиз (етIани зы миллион фэдиз мебельхэм апае) къатIупщыгъ. Апэрэ едзыгъом хахьэу онкологическэ диспансерыр зычIэт къатищ хъурэ унэр икIэрыкIэу зэтырагъэпсыхьа­жьыщт, иинагъэ зырагъэушъомб­гъуным фэшI яплIэнэрэ къат тырашIыхьащт. Ащ ишIуагъэкIэ квадрат метрэ мин 1,3-рэ къы­хэхъощт. IофшIэнхэр зыгъэцэ­кIэщт псэолъэшIхэр зэнэкъокъу шIыкIэм тетэу къыхахыщтых. ЗэрагъэнэфагъэмкIэ, тызыхэт илъэсыр хэтэу ыкIи къи­хьащтым ыкIэм нэс Iоф­шIэнхэр аухыгъэнхэу ары. Джащ фэдэу, гухэлъышIоу яIэхэм ащыщ 2028-рэ илъэсым диспансерым ыбгъукIэ джыри зы псэо­лъэшIыгъакIэ инэу къы­гуашIыхьанэу, — къы­Iуагъ АкIэгъу Заур.
Врач шъхьаIэм къызэрэхигъэщыгъэмкIэ, игъэ­кIотыгъэ гъэцэкIэжьынхэм къахэкIэу Iэзэн Iофыр къы­зэтеуцуагъэп, сы­маджэхэм ящыкIэгъэ медицинэ IэпыIэгъур арагъэ­гъотыщт. Диспансерым иотделениехэр зэкIэ зы чIыпIэ щамыугъоигъэхэми, амалэу щыIэмкIэ респуб­ликэм ит сымэджэщхэм атырагощагъэх.

— Онкодиспансерыр зы чIыпIэ щыугъоигъэным фэшI АР-м псауныгъэр къэухъумэгъэнымкIэ иминистрэу Мэрэтыкъо Рус­тем ежь ышъхьэкIэ къалэм дэт псэолъэшIыгъэхэр, сымэджэщхэр къыплъы­хьагъэх. Ау ащ иинагъэкIэ зычIэфэн ыгъотыгъэп. Ащ къыхэкIыкIэ Мыекъопэ къэлэ сымэджэщым хи­миотерапевтическэ, гематологическэ отделениехэр ыкIи мафэрэ зычIэлъы­хэрэ стационарыр тхьыгъэх. Тищагу радиотерапевтическэ отделениер къыдэнагъ. Мыекъуапэ иурамэу Комсомольскэм тет IэзэпIэжъыр зычIэтыгъэм джы типоликлиникэ щыIэщт, цIыфхэм ящыкIэгъэ IэпыIэгъур арагъэ­гъотыщт. Анахь шъхьэIэ хирургическэ отделении­тIур, реанимациер ыкIи операционнэ блокыр Кощ­хьэблэ гупчэ район сы­мэджэщым дгъэкощыгъэх. АщкIэ гъолъыпIэхэм къащыкIагъэп, тиIэгъэ 50-р тагъэгъотыгъ. ТхьамэфитIу хъугъэу операциехэри, Iэзэн Iофыри ащ щылъэ­кIуатэх, — хигъэунэфыкIыгъ АкIэгъу Заур.
ТигущыIэгъу къызэри­IуагъэмкIэ, медицинэ IофышIэхэр Кощхьаблэ зэращэщтхэмкIэ гумэкIыгъо щыIэп. Шъолъыр бюджетым къафыхагъэкIи, чIыпIэ 18 зиIэ автобус цIыкIу къащэфыгъ. Ащ нэмы-
кIэуи ежь диспансерым транспортитIу иIагъ, гъэ­нэфагъэу яIэм ахэмкIэ медицинэ IофышIэхэр ры­зэращэх.

Сымаджэхэр Кощхьэблэ гупчэ район сымэ­джэщым зэрекIолIэщтхэр зэшIохыгъэ хъугъэ. АР-м и ЛIышъхьэу КъумпIыл Мурат иунашъокIэ автобус къытырагъэхьагъ. Ар непэ тIо Мыекъуапэ ивокзал IокIышъ, сымэджэщым екIуалIэ, джащ фэдэу тIо къегъэзэжьы.
— КъыдгурэIо, онко­диспансерым игъэкIотыгъэ гъэцэкIэжьынхэр ра­шIылIэфэхэ, сымаджэхэм мытынчыныгъэ къызэрафихьыщтыр. IофшIэкIэ амалышIухэр щыIэнхэм, сымаджэхэр зэрылъыщт-
хэ палатэхэр гуIэтыпIэнхэм мыр фэIорышIэщт. Сыд фэдизэу амалыкIэ­хэри бгъэфедагъэхэми, IэзапIэм ыкIоцI шэпхъэшIухэм адимыштэмэ, сымаджэм ыгу мэкIоды. Джащ фэдэу нэбгырабэ зэдилъэу, зым уз хьылъэу иIэр зимыIэм зи­лъэгъукIэ, ар ышъхьэ фе­хьыжьы. Ари гъэцэкIэ­жьынхэм ауж дэгъэзыжьыгъэ хъущт, сыда пIомэ зэрэдгъэнэфагъэмкIэ, палатэхэр нэбгыритIу-
мэ ателъытэгъэщт, — къы­хигъэщыгъ АкIэгъу Заур.
Iэшъынэ Сусан.