Адыгеим иминистрэхэм я Кабинет иIофшIэгъу зэхэсыгъоу АР-м и ЛIышъхьэу КъумпIыл Мурат тхьамэтагъор зыщызэрихьагъэм унэгъо ныбжьыкIэхэм, кIэлэцIыкIу ибэхэм унэхэр зэраратыщт, зэхэонкIэ щынагъоу щыт псэу­пIэхэм цIыфхэр къазэрачIащыжьыщтхэ шIыкIэм щатегущыIагъэх.

АР-м псэолъэшIынымкIэ, псэупIэ-коммунальнэ, гъогу хъызмэтымкIэ иминистрэу Ва­лерий Картамышевым зэ­фэхьысыжь шъхьаIэр мыщ къыщишIыгъ. Зигугъу къэтшIыгъэ Министерствэм къызэритыгъэмкIэ, къэралыгъо программэу «Урысыем играж­данхэм псэупIэ дэ­гъухэр къафэгъотыгъэнхэм ыкIи коммунальнэ фэIо-фа­шIэхэр афэгъэцэкIэгъэнхэм яхьылIагъ» зыфиIорэм диштэу 2025-рэ илъэсым унэгъо ныб­жьыкIэ 98-мэ сомэ миллион 243-рэ зытефэщт унэхэр къафащэфынэу рахъухьэ. А мылъкум щыщэу сомэ миллион 79,1-р федеральнэ бюд­жетым къыхэкIыгъ. Илъэсэу итым имэлылъфэгъу унэгъо ныбжьыкIэ 17-мэ псэукIэ амалэу яIэхэр нахьышIу афа­шIыгъэх, адрэ къэнагъэхэм Iоныгъом икIэухым нэс псэу­пIэхэр арагъэгъотыщтых.
2025-рэ илъэсым кIэлэ­цIыкIу ибэхэм зыщыпсэущт-
хэ унэхэр арагъэгъотынхэм пае сомэ миллион 333,8-рэ къыхагъэкIыгъ. Ащ щыщэу сомэ миллион 300-р респуб­ликэ бюджетым, сомэ миллион 33,8-р федеральнэ бюджетым къахагъэкIыгъ. А мылъкумкIэ псэупIэ 97-рэ къащэфын ямурад. Непэрэ мафэм ехъулIэу фэгъэкIотэныгъэ зиIэ цIыфхэм фэтэр 73-рэ къафагъотыгъах.
КъумпIыл Мурат зэхэсыгъом къызэрэщыхигъэщы­гъэмкIэ, унэ къызэратынэу фитыныгъэ зиIэхэр чэзыум нахь макIэрэ республикэм щыхэтынхэмкIэ ищыкIэгъэ амалхэр зехьэгъэнхэ фае. Ащ пае илъэс­ныкъом икIэуххэм ателъытагъэу фэтэрхэр нахьыбэу къафэгъотыгъэнхэм иIофыгъо хэплъэщтых.
«КIэлэцIыкIу ибэу 150-мэ гъэрекIо псэупIэхэр ядгъэгъотыгъэх. Пчъагъэр гъэрекIорэм къыщыдгъакIэ хъущтэп. ПсэолъэшIхэм Iоф адашъушI, псэупIэхэм хэхъоныгъэ зэрарагъэшIырэ программэхэм адиштэу унэхэр жъугъэпсых. Гухэлъым къедгъэхъузэ ыпэкIэ тылъыкIотэнымкIэ ищыкIэгъэ амалхэр зэкIэ тиIэх», — къыIуагъ Адыгеим и ЛIы­шъхьэ.
АР-м псэолъэшIынымкIэ, псэупIэ-коммунальнэ, гъогу хъызмэтымкIэ и Министерствэ къызэритыгъэмкIэ, къызэхэонкIэ щынагъоу щыт унэхэм цIыфхэр къачIэщыжьыгъэнхэм тегъэпсыхьэгъэ программэм игъэцэкIэн республикэм щылъа­гъэкIуатэ. 2025-рэ илъэсым щылэ мазэм и 1-м ехъулIэу ащ фэдэ псэупIэ квадрат метрэ мин 25-рэ фэдизмэ ачIэсхэм нэмыкI псэупIэ къафагъотын фэягъ.
ЗэхэонкIэ щынагъоу щыт псэупIэ квадрат метрэ мини 7,5-мэ цIыфхэр къачIэщыжьыгъэнхэм пае 2025 — 2030-рэ илъэсхэм сомэ миллион 423,8-рэ чIыпIэхэм хэхъоныгъэ языгъэшIырэ Фондым къыхагъэкIыщт. Ащ нэмыкIэу 2025 — 2027-рэ илъэсхэмкIэ республикэ бюджетым а Iофыгъом пае сомэ миллион 347,4-рэ къыщыдэлъытагъ, а ­мылъкумкIэ квадрат метрэ мини 4 фэдизмэ ачIэсхэм нэмыкI псэупIэ къафагъотын алъэкIыщт.