Урысыем IофшIэнымкIэ и ЛIы­хъужъэу, Адыгеим, Къэбэртэе-­Бэлъкъарым ыкIи Къэрэщэе-­Щэрджэсым янароднэ тхакIоу, общественнэ IофышIэшхоу ­МэщбэшIэ Исхьакъ къызыхъу­гъэр илъэс 95-рэ зэрэхъурэм изыфэгъэхьазырынкIэ ыкIи ащ епхыгъэ Iофтхьабзэхэр зэхэщэгъэнхэмкIэ комитетым изэхэсыгъо АР-м и Правительствэ зычIэт унэм щыкIуагъ.

Адыгеим и ЛIышъхьэу КъумпIыл Мурат пшъэрылъ зэрэфишIыгъэм тетэу зэхэсыгъор зэрищагъ Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр.
Зэхэсыгъом иIофшIэн хэлэжьагъэх АР-м иминистрэхэм я Кабинет хэтхэр, шъолъыр къулыкъухэм, гуманитар ушэтынхэмкIэ Адыгэ республикэ институтэу КIэрэщэ Тембот ыцIэкIэ щытым, къэбарлъыгъэIэс амалхэм, нахьыжъхэм я Совет япащэхэр, Адыгэ къэралыгъо университетымрэ Мыекъопэ къэралыгъо технологическэ университетымрэ ялIыкIохэр, муниципальнэ образованиехэм япащэхэр.
Шъхьэлэхъо Аскэр къызэгущыIэм къызыщыуцугъэр тхакIом июбилей фэгъэхьыгъэ Iофтхьэбзэ шъхьаIэхэр ары. Агъэнэфагъэхэм ащыщых творческэ пчыхьэзэхахьэхэр, театральнэ ыкIи концерт къэгъэлъэгъонхэр, тхакIом иIоф­шIагъэхэм япхыгъэ зэнэкъокъухэр ыкIи викторинэхэр. Илъэсым къыкIоцI литературнэ зэIукIэгъухэу рекIокIыщтхэр зыфытегъэпсыхьагъэхэр адыгабзэмрэ литературэмрэ ягъэшIэгъэнхэр ыкIи анаIэ нахь къатырарагъэдзэныр ары.
НепэкIэ къытырадзэгъахэх МэщбэшIэ Исхьакъ исатыриплI усэхэр зыдэт тхылъхэр. ТхакIом студентхэм, общественностым илIыкIохэм, тхылъеджэхэм зэIукIэгъухэр адешIых. Гуманитар ушэтынхэм апылъ Адыгэ республикэ институтым щыкIогъэ конференцием хэлэжьагъэх Темыр Кавказым иреспубликэхэм ыкIи Абхъазым янаучнэ IофышIэшхохэр. Телеграм-каналым «МэщбашIэм теджэ» зыфиIорэ литературнэ Iофтхьабзэм фэгъэхьыгъэхэр къехьэх. Республикэ ыкIи муниципальнэ гъэзетхэм тхэкIошхом фэгъэхьыгъэ тхыгъэхэр бэу къыхаутых. МэщбэшIэ Исхьакъ ищыIэныгъэрэ итворчествэрэ афэгъэхьыгъэ фильмым изы­фэгъэхьазырын макIо, Волгоград, Къэ­бэртэе-Бэлъкъарым, Къэрэщэе-Щэр­джэсым, Краснодар ыкIи Ставрополь крайхэм якъэралыгъо телерадиокомпаниехэм ахэр къагъэлъэгъонхэу игъо афалъэгъущт.
МэщбэшIэ Исхьакъ итворчествэ фэгъэхьыгъэ мэфэкI концертэу сыхьатым къыкIоцI кIощтым фэгъэхьыгъэу къыIотагъ АР-м культурэмкIэ иминистрэу Аулъэ Юрэ. Республикэм и Концерт ыкIи и Театральнэ зэхахьэхэм яартистхэмрэ ятворческэ купхэмрэ ащ хэлэ­жьэщтых. Къэралыгъо ансамблэу «Налмэсыр» театрализованнэ къэгъэлъэ­гъоным хэлэжьэщт, тхэкIошхом иусэхэм къяджэщтых, ытхыгъэхэм ащыщхэу орэ­дышъом ралъхьагъэхэр къаIощтых, прозэкIэ тхыгъэхэм япычыгъохэм къя­джэщтых.
АР-м гъэсэныгъэмрэ шIэныгъэмрэкIэ иминистрэу Евгений Лебедевым къы­Iотагъ гъэсэныгъэ зыщарагъэгъотырэ учреждениехэм ыкIи тхылъеджапIэхэм къэгъэлъэгъонхэр, анахь дэгъоу усэхэм къяджэхэрэмрэ сурэтхэр зышIыхэрэмрэ язэнэкъокъухэр зэращызэхащэщтхэр. ХэушъхьафыкIыгъэу а IофыгъомкIэ къэ­гущыIагъэх муниципальнэ образование пстэуми япащэхэр.
Шъугу къэтэгъэкIыжьы: МэщбэшIэ Исхьакъ 1930-рэ илъэсым жъоныгъуакIэм и 28-м Краснодар краим ит къуаджэу Шъхьащэфыжь къыщыхъугъ, Адыгэ кIэлэегъэджэ училищыр ыкIи М. Горькэм ыцIэкIэ щыт литературнэ институтыр къыухыгъэх. МэщбэшIэ Исхьакъ тхылъ 90-м ехъу ытхыгъ. Адыгэ Республикэм и Гимн хэлъ гущыIэхэри ащ иех. Илъэс зэфэшъхьафхэм зэдзэкIын Iофым иIахь хишIыхьагъ, адыгабзэм рилъхьагъэх «Слово о полку Игореве», А. Пушкиным, М. Лермонтовым, Н. Нек­расовым, А. Блок, С. Есениным, В. Маяковскэм атхыгъэхэм ащыщхэр. КъурIаныр адыгабзэм илъхьэгъэным дэлэжьагъэхэм ащыщ. Ащ ытхыгъабэхэр дунаим ихэгъэгу зэфэшъхьафхэм къащыдагъэкIыгъэх. МэщбэшIэ Исхьакъ —СССР-м, РСФСР-м, Адыгэ Республикэм я Къэралыгъо шIухьафтынхэм ялауреат, джащ фэдэу литературэмрэ искусствэмрэ алъэныкъокIэ М. Шолоховым идунэе шIухьафтын къыфагъэшъошагъ. Ащ ироман техыгъэ художественнэ фильмэу «Графиня Айссе» зыфиIорэр агъэуцугъ.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.