Псыхъоу Шъхьэгуащэ рафтинг щыкIозэ, къечъэхыпIэм хъулъфыгъэр зэрэщыхэкIодагъэм епхыгъэ уголовнэ Iофэу къызэ­Iуахыгъэм изэхэфын Урысыем и Следственнэ комитет иследственнэ ГъэIорышIапIэу АР-м щыIэм лъегъэкIуатэ.

ЗэрагъэунэфыгъэмкIэ, унэе предпринимателэу, Мыекъопэ районым изыгъэ­псэфыпIэ базэ ипащэ псыхъоу Шъхьэгуащэ къехынхэмкIэ хэбзэнчъэу рафтинг цIыфхэм афызэхищагъ. Мыхэм ахэтыгъэ инструкторым цIыфхэр псым къыщырищэкIынхэмкIэ ыкIи мыщ фэдэ Iофтхьабзэхэр зэхищэнхэмкIэ ищыкIэгъэ тхы­лъыр иIагъэп.
Шъугу къэдгъэкIыжьын, 2025-рэ илъэ­сым мэлылъфэгъум и 21-м Мыекъопэ районым ит псэупIэу ХъымыщкIэй дэжькIэ псыхъоу Шъхьэгуащэ къехызэ, куп зэрысыгъэ къуашъор зэпыригъэзагъ. Ащ исыгъэ нэбгыриплIыр ыкIи инструкторыр псым хэфагъэх. Ахэм ащыщэу зы нэбгырэр псыорым къыхэкIыжьышъугъэп, ытхьэлагъ.
Мы мафэм ехъулIэу унэе предпринимателым бзэджэшIагъэ зэрихьагъэу агъэмысэ. Уголовнэ Iофым изэхэфын лъагъэкIуатэ.