ХэушъхьафыкIыгъэ дзэ операцием хэлажьэхэрэм аратырэ ахъщэ тынхэм ыкIи арагъэгъотырэ IэпыIэгъум Адыгеим щыхагъэхъуагъ.

— Хабзэм икъулыкъухэм яIоф­шIэнкIэ анахь мэхьанэ зэратыхэрэм ащыщ хэушъхьафыкIыгъэ дзэ операцием хэлажьэхэрэм IэпыIэгъу ятыгъэныр. УФ-м и Президент иунашъокIэ — 2025-р хэгъэгум иухъумакIо и Илъэсэу зэрагъэнэфагъэм ыкIи Хэгъэгу зэошхом ТекIоныгъэр къызщыдахыгъэр ­илъэс 80 зэрэхъугъэм ихэгъэу­нэфыкIын къадыхэлъытагъэу ащ фэдэ IофшIэным имэхьанэ нахь зыкъеIэты, — къыщиIуагъ КъумпIыл Мурат 2024-рэ илъэсым республикэм иминистрэхэм я Кабинет Iофэу ышIагъэр зыщызэфахьысыжьыгъэ зэхэсыгъом.
Адыгеим и ЛIышъхьэ къызэрэхигъэщыгъэмкIэ, тиухъумакIохэм, ахэм ядзэ гъэхъагъэхэм респуб­ликэм щыпсэухэрэр арэгушхох. Ахэм ялIыхъужъныгъэ ыкIи япытагъэ къэзыушыхьатырэ тамыгъэу хъугъэ икIыгъэ илъэсым ичъэпыогъу мазэ дзэ техникэм икъэгъэлъэгъонэу Мыекъуапэ щыкIуагъэр.
Адыгеим икIыгъэ дзэкъулыкъушIэ мини 4-м ехъумэ ялIыхъужъныгъэ ыкIи ялIыгъэ апае къэралыгъо тын лъапIэхэр къафагъэшъошагъэх, ахэм ащыщэу нэбгырэ 500-м ехъумэ ЛIыхъужъныгъэм иорден къаратыгъ. ТичIыпIэгъу нэбгыри 4-мэ ядунай захъожьыгъэ нэужым апшъэрэ щытхъуцIэу «Урысыем и ЛIыхъу­жъыр» къафагъэшъошагъ гвардием истаршэ лейтенантэу Валерий Заволянскэм, майорэу Вадим Лемеш, генерал-лейтенантэу Олег Цоковым ыкIи полковникэу Роман Тороховым. Хэбзэ къулыкъухэм дзэ частхэу тичIыпIэгъухэр зыдэщы­Iэхэм зэпхыныгъэ адыряI. НепэкIэ хэушъхьафыкIыгъэ дзэ операциер зыщыкIорэ шъолъырым шIушIэ IэпыIэгъу тонн мини 3-м ехъу на­гъэсыгъ, ащ щыщэу тонн 300-р Херсон хэкум ирайонхэу тынаIэ зытедгъэтыхэрэм ащыпсэурэ цIыф­хэм афащагъ. Мы Iофым чанэу къыхэлажьэх общественнэ ыкIи по­литическэ организациехэр: партиеу «Единэ Россием» ишъолъыр къутамэ, шIушIэ фондэу «Народный фронт» зыфиIорэр, АР-м ибзылъфыгъэхэм я Союз, Хэгъэгум идзэ­кIолIхэм яунагъохэм я Комитет ишъолъыр къутамэ, Шъэумэн Хьазрэт ыцIэкIэ щыт Фондыр.
ХэушъхьафыкIыгъэ дзэ операцием хэлажьэхэрэм ыкIи ахэм яунагъохэм IэпыIэгъу ятыгъэным фэIорышIэрэ Iофтхьэбзабэ республикэм щызэрахьэ. Дзэ операцием кIохэ­рэм, федеральнэ ахъщэ тыныр зэ­рэхэтэу, зэтыгъоу ахъщэ сомэ миллиони 2,4-рэ фэдиз араты.
Фон­дэу «Хэгъэгум иухъумакIохэр» зыфиIорэм ишъолъыр къутамэ къы­IэкIэхьэгъэ лъэIу тхылъхэм япроцент 91-р зэшIуахыгъах. 2024-рэ илъэсым къыщегъэжьагъэу джыри зы IэпыIэгъукIэ къыхэхъуагъ — дзэ операцием хэлажьэу УФ-м иорден къызфагъэшъошагъэм иунагъо ыпкIэ хэмылъэу чIыгу ратынэу.
Тызхэт илъэсым имэзае къыщыу­благъэу къэралыгъом ипащэ игукъэ­кIыкIэ федеральнэ программэу «Уахътэм илIыхъужъхэр» зыфиIорэм къыдыхэлъытагъэу, IофышIэхэм ягъэхьазырын проектхэр шъолъырым щыпхырыщыгъэнымкIэ программэу «Адыгеим и ЛIыхъужъхэр» щырагъэжьагъ. ХэушъхьафыкIыгъэ дзэ операцием хэлажьэхэрэм IэпыIэгъу ятыгъэным пае илъэсэу икIыгъэм сомэ миллиарди 2-м ехъу пэIуагъэхьагъ.