АР-м и ЛIышъхьэу КъумпIыл Мурат 2024-рэ илъэсым республикэм ими­нистрэхэм я Кабинет Iофэу ышIагъэр зыщызэфа­хьысыжьыгъэ зэхэсыгъом къыщиIуагъ Iоф зышIэрэ цIыфхэм диспансеризациер Iэрыфэгъоу акIуным фэшI IэзапIэхэм яIофшIэн пчы­хьэрэ ыкIи зыгъэпсэфыгъо мафэхэм зэхэщэгъэн фаеу.

Узыбэ къямыутэкIынымкIэ ыкIи гъэхъужьыгъэнхэмкIэ медицинэ уплъэкIунхэм цIыфыбэ къырагъэубытыным мэхьанэ зэриIэр Адыгеим ипащэ хигъэунэфыкIыгъ. А пшъэ­рылъыр гъэцэкIагъэ хъунымкIэ инфраструктурэр агъэкIэжьыныр, анахьэу ублэпIэ къутамэр, медицинэ учреждениехэр зэтегъэпсы­хьэгъэнхэр, пэрыт медицинэ Iэпы­Iэгъум хэхъоныгъэ ышIыныр джыри лъагъэкIотэщт.
— Адыгеим медицинэ IэпыIэ­гъум изытет Iэрыфэгъу ыкIи нахьышIу щышIыгъэным республикэм ихэбзэ къулыкъухэм тапэкIи анаIэ тырагъэтыщт, тишъолъыр щыпсэухэрэм япсауныгъэ къызэтегъэнэгъэным акIуачIэ фагъэIорышIэщт. Тинэ­плъэгъу итыщтыр — узыр къэмыгъэхъугъэныр, ар пасэу къыхэ­гъэщыгъэныр. АщкIэ анахь амалышIур цIыфхэм диспансеризациер акIуныр ары, — къыIуагъ КъумпIыл Мурат.
Медицинэ учреждениехэм яврач шъхьаIэхэр ыкIи муниципальнэ об­разованиехэм япащэхэр Iофыгъом икъоу лъыплъэнхэр, цIыфхэр медицинэ организациехэм е медицинэ IофышIэхэр уплъэкIунхэр зыщашIыщтым ящэлIэгъэнхэр зэрэзэхэщэгъэн фаем Адыгеим и ЛIышъхьэ мы Iофым фэгъэзэгъэ министерствэм ынаIэ тырыригъэдзагъ.
2024-рэ илъэсым пэшIорыгъэшъ уплъэкIунхэм ыкIи диспан­сери­зацием кIэлэцIыкIу мин 91-рэ, ныбжь зиIэ мин 262-рэ къызэ­лъырагъэубытыгъ.