2025-рэ илъэсым жъоныгъуакIэм и 16-м Россельхознадзорым Къыблэ шъолъырымкIэ и ГъэIорышIапIэ иIофшIэгъу дэкIыгъо хахьэу цIыфхэм япсауныгъэкIэ щынагъо къэ­зытырэ амброзиер Адыгэ Республикэм къызыщыкIырэ чIыпIэхэр къаплъыхьагъэх.

Амброзием ебэныгъэныр Iофыгъо шъхьаIэу зэрэщытыр къыдалъытэзэ ветеринар ыкIи фитосанитарнэ лъыплъэнымкIэ Федеральнэ къулыкъум и Къыблэ шъолъыр гъэIорышIапIэр, АР-м и Къэралыгъо хэбзэ къулыкъухэр, чIыпIэ зыгъэIорышIэжьын къулыкъухэр зэгъусэхэу 2025-рэ илъэсым телъытэгъэ Iофтхьабзэр рагъэкIокIыгъ.
Россельхознадзорым Къыблэ шъолъырымкIэ и ГъэIорышIапIэ уплъэкIунэу ышIыгъэхэмкIэ, IофшIэкIо купым хэтхэм чIыгу Iахь 67-мэ амброзиер къащыкIэу къыхагъэщыгъ.
Хэукъоныгъэу къыхагъэщыгъэхэр яIэубытыпIэу чIыгу Iахьхэр зыехэм пшъэдэкIыжьхэр арагъэхьыщтых.
УФ-м ихэбзэгъэуцугъэ къызэригъэнафэрэмкIэ, къэ­кIыхэрэ уцыжъхэм алъэныкъокIэ шапхъэхэр зыукъо­хэрэм пшъэдэкIыжь арагъэхьыщт цIыф къызэрыкIохэу ыкIи юридическэ цIыфхэу унэе хъызмэтшIапIэ зиIэхэм ыкIи бэджэндэу чIыгу зыIыгъхэм, адрэ чIыгоу зэкIэми зэдагъэфедэхэрэм къащыкIырэ амброзием ебэныгъэ­нымкIэ пшъэдэкIыжьыр зыпшъэ дэкIыщтыр муниципальнэ образованиехэм яадминистрациехэр ары.
Амброзием ебэныгъэныр Iофыгъо шъхьаIэу зэрэщытыр къыдилъытэзэ ГъэIорышIапIэм цIыфхэм агу къегъэкIыжьы къэгъэгъэнэу римыгъажьэзэ амброзием ебэныгъэнымкIэ Iофтхьабзэхэр зэрахьэнхэу. Амброзием ыкIэхэр зыхэлъ мэкъумэщ культурэхэр апхъы, джащ фэдэу мы уцыжъым ыкIэхэр зыхэлъ продук­циер ащэ ыкIи чIэлъхьапIэхэм ащаIыгъы хъущтэп.
Россельхознадзорым Къыблэ шъолъырымкIэ
и ГъэIорышIапI.