Урысые дзэ-патриотическэ джэгукIэу «Зар­ница» зыфиIорэм ишъолъыр уцугъо мы мафэхэм Мыекъуапэ щэкIо.

Республикэм ирайонхэм ыкIи икъалэхэм къарыкIыгъэ кIэлэ­еджэкIо 200-м ехъу ащ хэлажьэ. Ахэр куп 21-рэ мэхъух, аныбжь елъытыгъэу щэу гощыгъэхэу зэнэкъокъух, Iофтхьабзэр мэфищэ кIощт.
КIэлэцIыкIухэмрэ ныбжьыкIэхэмрэ я Урысые общест­веннэ-къэралыгъо зэхахьэу «Движение Первых» зыфиIорэм ипроект шъхьаIэхэм мыр ащыщ. НыбжьыкIэхэм пат­риотическэ пIуныгъэ яIэу гъэ­сэ­гъэнхэр, физическэу ухьа­зы­рыгъэнхэр, дзэ къулыкъум нэ­Iуасэ фэшIыгъэнхэр ары пшъэ­рылъ шъхьаIэр.
Iофтхьабзэр мэфэкI шIыкIэм тетэу къызэIуахыгъ. Адыгеим и ЛIышъхьэу КъумпIыл Мурат ыцIэкIэ къэзэрэугъоигъэхэм шIуфэс къарихыгъ АР-м и ЛIы­шъхьэрэ АР-м иминистрэхэм
я Кабинетрэ я Администрацие ипащэу Владимир Свеженец. Хэгъэгу зэошхом ТекIоныгъэр къызщыдахыгъэр илъэс 80 зыщыхъугъэм мыщ фэдэ Iоф­тхьабзэхэм язэхэщэн мэхьа­нэшхо зэриIэр къыIуагъ. Хэгъэ­гум икъэухъумэн ыпэрапшIэу УФ-м и УIэшыгъэ КIуачIэхэм, дзэкIолIхэм аIэ зэрилъыр къыхигъэщыгъ. Нэбгырэ пэпчъ ицIы­кIугъом къыщегъэжьагъэу ихэгъэгу шIу ылъэгъун, ыгъэлъэпIэн, къыухъумэн зэрэфаем къыкIигъэтхъыгъ.

— Муниципальнэ уцугъом текIоныгъэ къызэрэщышъухьыгъэм ишIуагъэкIэ дзэ частым зыщышъуушэтын амал шъуиIэ хъугъэ. Дзэм къулыкъу щыпхьыным къиныгъоу, пшъэдэкIыжьэу пылъхэр шъулъэгъущтых. Мыщ шIэныгъэу щызэжъугъэгъотыхэрэр ыпэкIэ къышъу­фэфедэжьыщтых, дзэ ухьазырыныгъэ шъуиIэщт, — къыIуагъ Владимир Свеженец.
Урысые Федерацием и Президентэу В. В. Путиным игукъэкIыкIэ «Движение Первых» зыфиIорэр зэрэзэхащагъэр, ащкIэ зэрэфэразэхэр, ныбжьыкIэ чанхэр мыщ зэрэщызэрэугъоигъэхэр, мэхьанэ зиIэ Iофтхьабзэхэр зэрэзэшIуа­хыхэрэр джащ фэдэу ащ къыIуагъ.
АР-м и Къэралыгъо Совет — Хасэм и Тхьаматэ игуадзэу, Урысыем и ЛIы­хъужъэу Цэй Эдуард нэужым къэзэрэугъоигъэхэм закъыфигъэзагъ. Дзэ-пат­риотическэ джэгукIэм зэрэхэлажьэхэ­рэмкIэ къафэгушIуагъ. Я 20-рэ лIэшIэгъум къыщегъэжьагъэу мыр анахь мэхьанэ зиIэ джэгукIэу зэрэщытыр къыхигъэщыгъ, ежьыми зэрэхэлажьэщты­гъэр ыгу къыгъэкIыжьыгъ. ЛIыгъэм иджэгукIэу зэрилъытэрэр къыIуагъ. Сыд фэдэ чIыпIэ ифагъэхэми текIоныгъэм фэбэнэнхэу, къызыщыхъугъэхэ республикэр, къэралыгъор шIу алъэгъунэу, яхэгъэгу агъэлъэпIэнэу, Урысыем ицIыфэу зэрэщытхэм рыгушхонхэу ныбжьыкIэхэм закъыфигъэзагъ.
Iофтхьабзэм изэхэщакIохэм ыкIи иэкспертхэм ахэтыгъэх хэушъхьафыкIыгъэ дзэ операцием иветеранхэр. Опытэу аIэкIэлъымкIэ адэгощагъэх. НыбжьыкIэ­хэр лIыхъужъхэм гущыIэгъу афэхъунхэ амал яIагъ.

Нэужым ныбжьыкIэхэм лъэныкъо 14-кIэ заушэтынэу аублагъ. ОшIэ-дэмышIэ Iоф къэхъумэ зэрэзекIощтхэр ашIэмэ уплъэкIугъэныр, дзэ къулыкъум фэгъэ­хьазырыгъэнхэр, цIыфым ищыIэныгъэ щынэгъончъэу щытыным алъэныкъокIэ шIэныгъэу ыкIи шIыкIэу аIэкIэлъхэр ушэтыгъэныр ары джэгукIэр анахьэу зыфэгъэхьыгъагъэр. Уцугъохэм къады­хэлъытагъэу къэчъагъэх, лъагъэх, автоматыр зэхалъхьагъ ыкIи зэхахыгъ, рыуа­гъэх, хэушъхьафыкIыгъэ щыгъынхэр уахътэкIэ зыщалъэзэ заушэтыгъ. Iофтхьабзэм къыдыхэлъытагъэу апэрэ IэпыIэгъур цIыфым зэребгъэкIыщтыри къагъэлъэгъуагъ.
ТекIоныгъэм фэбэнэрэ купхэм ухьазырыныгъэ дэгъу къагъэлъэгъуагъ. Те­кIоныгъэ къыдэзыхыщт купыр Урысые уцугъом хэлэжьэщт.
Теуцожь районымкIэ къуаджэу Нэ­шъукъуае дэт гурыт еджапIэм къикIыгъэ купым ипащэ анахь чанхэм ащыщ. Я 11-рэ классым ис ГъукIэлI Умед къызэ­рэтиIуагъэмкIэ, мы зэнэкъокъум апэрэп зэрэхэлажьэрэр. ГъэрекIо муниципальнэ уцугъом ятIонэрэ чIыпIэ къыщыдахыгъагъ, мыгъэ шъолъыр едзыгъом хэлэ­жьэнхэ амал яIэ зэрэхъугъэм рэгушхо. Дзэ частым ыкIоцI ушэтыпIэ къинхэм зэ­рапхырыкIыхэрэм нахь кIуачIэ къахилъхьэу, лIыгъэм фищэхэу ащ елъытэ. Мыщ ишIуагъэкIэ дзэм къулыкъу щахьыныр нахь IэшIэх къафэхъущт. Зэрифэшъуашэу зыкъызэрагъэлъагъорэмкIэ якIэлэегъаджэу Нэшъукъо Байзэт зэрэ­фэразэхэр къыхигъэщыгъ.
ДЕЛЭКЪО Анет.