УФ-м ошIэ-дэмышIэ ­IофхэмкIэ и Минис­терствэ и ГъэIоры­шIа­пIэу АР-м щыIэм макъэ ­къызэригъэIугъэмкIэ, жъоны­гъуакIэм и 20-м пчыхьэм, и 21-м чэщым ыкIи пчэды­жьым
Адыгэ Республикэм ичIыпIэ­хэм нэгъэупIэпIэгъум метрэ 21 — 23-рэ зилъэшыгъэ жьыбгъэшхо къащепщагъ, ощхышхо къа­щещхыгъ.

Гъубдж пчыхьэм такъикъ заулэм къи­лъыгъэ жьыбгъэ лъэшым республикэм ичIыпIэ зэфэшъхьафхэм чъыгхэр ащырикIыкIыгъ, электричествэ рыкIуапIэхэр ащызэпичыгъэх. Ащ ыпкъ къикIэу унэгъуабэмэ нэфынэ ямыIэу къэнагъэх.
Мыекъопэ къэлэ администрацием къызэритыгъэмкIэ, жьыбгъэшхоу щыIагъэм ыпкъ къикIэу Мыекъуапэ ирайон цIыкIухэм ащыщхэм электричествэм ирыкIуапIэхэр ащызэпитхъыгъэх.
ГумэкIыгъом идэгъэзыжьын къалэм иэнергетикхэр псынкIэу ыуж ихьагъэх. Электричествэм ирыкIуапIэхэр, зэбгырыщыпIэхэр агъэцэкIэжьыгъэх. Коммунальнэ къулыкъум иIофышIэхэм жьыбгъэм риутыгъэ чъыгхэр Iуащы­жьыгъэх, общественнэ чIыпIэхэр агъэкъэбзэ­жьыгъэх.
Мыекъопэ ТЭЦ-м ибригадэ­хэм къакIу­хьэхэзэ электри­чествэ зимыIэу къэнагъэхэр къыхагъэщыгъэх, джащ фэдэу нэфрыгъуазэхэр агъэцэ­кIэ­жьыгъэх.
Поселкэхэу Инэмрэ Яблоновскэмрэ жьыбгъэшхоу щыIагъэм къыхэкIэу чъыгитIу ащырикIыкIыгъэу Тэхъутэмыкъое район администрацием къытыгъ. Гу­мэкIыгъом идэгъэзыжьынкIэ а чIыпIэм къулыкъу зэфэшъхьаф­хэм Iоф щашIагъ.
Мы ошIэ-дэмышIэм зыпари хэкIодагъэп ыкIи шъобжхэр атещагъэхэ хъу­гъэп. ЩыIэны­гъэм­кIэ мэхьанэ зиIэ псэуалъэ­хэм зэрар арихыгъэп. Гид­роме­теорологиемкIэ ыкIи ты­къэзыуцухьэрэ дунаим лъы­плъэгъэнымкIэ Гупчэм къы­зэритыгъэмкIэ, мы мафэхэм ощхыр уцу­жьыщт, фабэр градус 29-м нэсыщт.
КIАРЭ Фатим.