ГъогурыкIоным ишапхъэхэмкIэ заушэтыгъ
Инспектор ныбжьыкIэхэм ядвижение зызэхащагъэр илъэс 52-рэ зэрэхъурэм ыкIи Хэгъэгум иухъумакIо и Илъэс афэгъэхьыгъэ республикэ зэнэкъокъоу «Унагъор гъогу хъугъэ-шIагъэхэм ащыухъумэгъэныр» зыфиIорэр кIэлэцIыкIухэм шIэныгъэ тедзэ зыщарагъэгъотырэ Гупчэм щыкIуагъ.
Iофтхьабзэм изэхэщакIохэм пшъэрылъ шъхьаIэу яIагъэр кIэлэцIыкIухэр зыхэфэрэ гъогу хъугъэ-шIагъэхэм общественностым ынаIэ тырегъэдзэныр ары.
Зэнэкъокъум хэлэжьагъэх Мыекъуапэ, Джэджэ, Кощхьэблэ ыкIи Шэуджэн районхэм ащыкIогъэ муниципальнэ зэнэкъокъухэм текIоныгъэ къащыдэзыхыгъэ кIэлэцIыкIухэмрэ ахэм янэ-ятэхэмрэ.
Къэралыгъо автоинспекцием ипащэ игуадзэу, полицием иполковникэу Александр Выходцевым зэнэкъокъум хэлажьэхэрэм къариIуагъ унагъо пэпчъ гъогурыкIоным ишапхъэхэр ыгъэцэкIэнхэ, ны-тыхэм гъогум сакъыныгъэ къыщызхагъэфэн, кIэлэцIыкIухэмкIэ щысэтехыпIэу щытынхэ зэрэфаер.
Зэнэкъокъур едзыгъуитфэу зэтеутыгъагъ. «Визитная карточка» зыфиIорэ лъэныкъомкIэ кIэлэцIыкIухэм къаIотагъ гъогурыкIоным ишапхъэхэр яунагъохэм зэращагъэцакIэхэрэр.
ЯтIонэрэ лъэныкъоу «Гъогу марафон» зыфиIорэм хэлажьэхэрэм джэгукIэ шъуашэм илъэу гъогурыкIоным ишапхъэхэм афэгъэхьыгъэ гъэцэкIэнхэмкIэ заушэтыгъ. Джащ фэдэу «Гъогу хъугъэ-шIагъэхэм ахэфагъэхэм апэрэ IэпыIэгъу псынкIэр ягъэгъотыгъэныр» зыфиIорэмкIэ бзылъфыгъэхэр зэнэкъокъугъэх. «Транспортым игъэIорышIэн» зыцIэм хъулъфыгъэхэр хэлэжьагъэх.
ЗэхэщакIохэм кIэлэцIыкIухэми анаIэ атырагъэтыгъ. «Велотриал» зыцIэ зэнэкъокъум хахьэу кушъхьэфачъэр щынэгъончъэу зефэгъэнымкIэ зыныбжь имыкъугъэхэм IэпэIэсэныгъэу аIэкIэлъыр къагъэлъэгъуагъ.
ТекIоныгъэ къыдэзыхыгъэхэр осэшIхэм къагъэнэфагъэх. Апэрэ чIыпIэр Джэджэ районым щыщ унагъоу Коваленко-Головченкэхэм къыдахыгъ. ЯтIонэрэр Мыекъуапэ щыщ Бабичевхэм афагъэшъошагъ. Ящэнэрэ чIыпIэр Кощхьэблэ районым щыщ Мэщыкъохэм ыкIи Шэуджэн районым щыщ Калайдинхэм яунагъохэм зэдагощыгъ.
Зэнэкъокъум изэхэщакIохэр ыкIи Кэралыгъо автоинспекцием икъулыкъушIэхэр республикэ зэнэкъокъум текIоныгъэ къыщыдэзыхыгъэхэм ыкIи хагъэунэфыкIырэ чIыпIэхэр къэзыхьыгъэхэм афэгушIуагъэх, нэпэеплъ шIухьафтынхэр аратыгъэх. ГъогурыкIоным ишапхъэхэр амыукъоныр унагъохэм хабзэ афэхъунэу къафэлъэIуагъэх.
АР-м хэгъэгу кIоцI IофхэмкIэ и Министерствэ и Къэралыгъо
автоинспекцие.