Адыгэ къэралыгъо уни­верситетым физкуль­турэм­рэ дзюдомрэкIэ и Институт зычIэт унэм ыгупэ Джэнчэтэ СултIан мы­жъосын щыфагъэу­цугъ.

Урысые Федерацием ыкIи Адыгэ Республикэм язаслуженнэ тренерэу, Адыгеим бзылъфыгъэ гандболым лъапсэ щыфэзышIыгъэ Джэнчэтэ СултIан Мосэ ыкъом фагъэуцугъэ мыжъосыным икъы­зэIухын фэгъэхьыгъэ зэхахьэм хэлэжьагъэх ащ иIофшIэгъугъэхэр, ригъэджагъэхэр ыкIи спорт сообществэм илIыкIохэр.
Мы тренер цIэрыIом ишIуагъэ­кIэ гандболисткэхэм ягъэхьазырынкIэ республикэр гупчэ хъугъэ, ащ дакIоу апэрэ бзылъфыгъэ командэу «Адыифыр» зэхищагъ. Мы командэр 1994-рэ илъэсым шъолъырым иIэ хъугъэ ыкIи джы къызнэсыгъэми къэралыгъом иапшъэрэ лигэ щешIэ.
Джэнчэтэ СултIан ыгъэсагъэ­хэм ащыщыбэхэр спортымкIэ дунэе класс зиIэ мастер хъугъэх, ныбжьыкIэхэм азыфагу щызэхащэрэ, Европэм ыкIи ду­наим язэнэ­къокъухэм хагъэунэ­фыкIырэ чIы­пIэхэр къащыда­хыгъэх. Ащ ыгъэ­сагъэхэм ащыщ нэбгырищмэ Урысыем ихэшы­пыкIыгъэ командэ хэтхэу 2008-рэ илъэсым Пекин щыкIогъэ Олимпиадэм тыжьын медальхэр къыщахьыгъэх.
Республикэм испорткомитет ипэщагъэу Джарымэкъо Юсыф къызэриIуагъэмкIэ, Джэнчатэм тренер IофшIэным ылъэныкъокIэ зыми хэмыкIокIэщт IэпэIэсэ­ныгъэшхо хэлъыгъ. 2001-рэ илъэ­сым къэралыгъом ихэ­шыпыкIыгъэ командэ дунаим ичемпионат текIоныгъэр къы­щыдихыгъ. Ащ хэтыгъэх Джэнчатэм ыгъэсэгъэ Анна Кареевар, Анна Игнатчен­кэр ыкIи Инна Суслинар.
2002-рэ илъэсым Джэнчэтэ СултIан щытхъуцIэу «Урысыем изаслуженнэ тренер» зыфиIорэр къыфагъэшъошагъ. 2003-м ащ идунай ыхъожьыгъ. 2014-рэ илъэсым щыублагъэу Мые­къопэ спорт еджапIэу N 1-м ащ ыцIэ ехьы.