Мы мафэхэм псэупIэу Къурджыпсым къашъохэмкIэ фестивалэу «Зы, тIу, щы, плIы, тфы – еджапIэм джыри сэкIо» зыфиIорэр щыкIуагъ. А 1-рэ классым къыщегъэжьагъэу я 11-м нэс арыс кIэлэеджакIохэр ащ хэлэжьагъэх.

КIэлэеджакIохэм сэнаущыгъэу ахэ­лъым хагъэхъоныр, къэшъоным нахь фэIазэхэр агъэунэфынхэр, мыукIытэхэу зыкъагъэлъэгъоным фэщэгъэнхэр ары зэхэщакIохэм пшъэрылъ шъхьаIэу зыфагъэуцужьыгъэр.
СыхьатитIурэ ныкъорэ еджапIэм икIэ­лэеджакIохэм зыкъагъэлъэгъуагъ. Агентствэу «Талантидэм» ипащэу Карен Каракьян къызэрэтиIуагъэмкIэ, класс пэпчъ орэдэу къыздэшъощтыр ежь-ежьырэу къыхихыгъ. Мэзищрэ ныкъорэ ахэм загъэхьазырыгъ.
— Мы еджапIэм сэри сычIэсыгъ, тикласскIэ къэшъоныр тикIасэу Iофтхьабзэхэр зэхатщэщты­гъэх. Творчествэм фэзыщэщтхэ Iофтхьабзэр мыщ щыредгъэ­кIокIынэу унашъо тшIыгъэ, еджа­пIэм ипащэу Ирина Воронцовар ыкIи кIэлэегъаджэхэр IэпыIэгъу къызэрэтфэхъугъэхэмкIэ тафэраз. Къэшъоным пкъы­шъолыр нахь пытэ ешIы, сэнаущыгъэм хегъахъо. Охътэ кIэкIым кIэлэеджакIохэм хореографым Iоф адишIагъ. Классым исыр зэкIэ ащ хэлэжьагъ, зэдыра­гъаштэзэ къэшъуагъэх. ЗэкIэмкIи къэгъэлъэгъон 11 къагъэхьазы­рыгъ, — еIо Карен Каракьян.
Хэгъэгу зэошхор заухыгъэр илъэс 80 зэрэхъугъэм къыдыхэлъытагъэу «Синий платочек», «Катюша», «Вперед, Россия» зыфиIорэ орэдхэр кIэлэеджакIохэм къы­хахыгъэх, ахэм къадэшъуагъэх. Я 9 — 11-рэ классхэм ащеджэхэрэм «Кур­джипский вальс» къашIыгъ.
КъэшъонымкIэ фестивалым цIыфыбэ къекIолIагъ, мыщ хэлэжьагъэхэм щытхъу тхылъхэр аратыгъэх. Къэшъоным епхыгъэ мыщ фэдэ Iофтхьабзэхэр джыри зэхащэнхэ гухэлъ зэряIэр зэхэщакIохэм къаIуагъ.
ДЕЛЭКЪО Анет.