КIэлэцIыкIухэм ящынэгъончъагъэ нахьыжъхэм аIэ илъ
Гъэмэфэ лагерьхэм кIэлэцIыкIухэм зызэрэщагъэпсэфырэм дакIоу гъогурыкIоныр щынэгъончъэнымкIэ шапхъэхэри арагъашIэх.
Адыгэ Республикэм гъэсэныгъэмкIэ и Министерствэ сэнэхьат IэпэIэсэныгъэм хэгъэхъогъэнымкIэ Адыгэ республикэ институтыр игъусэу вожатэхэм ыкIи кIэлэцIыкIу лагерьхэм якIэлэпIухэм афызэхащэгъэ егъэджэн Iофтхьабзэм Къэралыгъо автоинспекцием икъулыкъушIэхэр хэлэжьагъэх.
Iофтхьабзэр кIэлэегъэджэ колледжэу Андрыхъое Хъусенэ ыцIэ зыхьырэм щыкIуагъ, ащ зэкIэмкIи республикэм ичIыпIэ зэфэшъхьафхэм къарыкIыгъэ вожатэ ыкIи кIэлэпIу 300 фэдиз хэлэжьагъ.
Къэралыгъо автоинспекторхэм вожатэхэм ыкIи кIэлэпIухэм араIуагъ лъэсрыкIо цIыкIухэм, кушъхьэфачъэр ыкIи мототранспортыр зыгъэIорышIэхэрэм гъогурыкIоным пылъ шапхъэхэр агу къагъэкIыжьынхэу, джащ фэдэу къэзыгъэнэфырэ узыгъэгъозэрэ пкъыгъохэр яIалъмэкъхэм ыкIи якIакохэм ащагъэфедэнхэу, транспортым сакъыныгъэ къыщызхагъэфэнымкIэ адэгущыIэнхэу.
Iофтхьабзэм изэхэщакIохэр мэгугъэх вожатэхэм ыкIи кIэлэпIухэм шIэныгъэу агъотыгъэхэмкIэ кIэлэцIыкIухэм адэгощэнхэу. КIэлэцIыкIухэм ящынэгъончъагъэ нахьыжъхэм аIэ зэрилъыр зыщагъэгъупшэ хъущтэп.
АР-м хэгъэгу кIоцI IофхэмкIэ и Министерствэ и Къэралыгъо автоинспекцие ипресс-къулыкъу.