Мыекъопэ къэралыгъо технологическэ университетым геоэкологиемкIэ я VIII-рэ Дунэе конференцие мы мафэхэм щыкIуагъ. Джырэ къэбарлъыгъэIэс шIыкIэхэр къызфэбгъэфедэхэзэ геологием, геофизикэм ыкIи геоэкологием узэрадэлэжьэщтым къэзэрэугъоигъэхэр тегущыIагъэх.

2009-рэ илъэсым къыщегъэжьа­гъэу мы Iофтхьабзэр зэхащэ. Геофизикэм ыкIи геоэкологием епхыгъэу Iоф зышIэхэрэр зэрэугъоих, хэхъоныгъэ­хэр языгъэшIыщт лъэныкъохэм арэгущыIэх.
Конференцием ипэублэ чIыопсым икъэухъумэн епхыгъэ лъэныкъохэм арыгущыIагъэх. Дунэе шIэныгъэ- прак­тическэ семинарэу «Непэрэ мафэм къыздихьырэ экологие гумэкIыгъохэр» зыфиIорэм епхыгъэу Iоф ашIагъ. ПэIудзыгъэ шIыкIэм тетэу Iофтхьабзэм хэлэжьагъэх Москва, Таганрог, Вьетнам, Китай, Кубэ, Мексикэм, Казахстан, Германием ыкIи Белоруссием ялIыкIохэр.
Программэм къыдыхэлъытагъэу доклад 92-рэ къагъэхьазырыгъ. Урысыем ишъолъыр 14-мэ, джащ фэдэу Абхъазым ыкIи Вьетнам ялIыкIохэм ахэр къашIыгъэх.
Iофтхьабзэм хэлажьэхэрэм шIу­фэс къарихыгъ апшъэрэ еджапIэм иректорэу Къуижъ Саидэ. Ащ къызэриIуа­гъэмкIэ, конференцием къырахьылIэгъэ темэхэр зэкIэ зигъо къэсыгъэх. Адыгеим экологиемкIэ изытет фэгъэ­хьыгъэ IофшIагъэу апшъэрэ еджапIэм ишIэныгъэлэжьхэм, Беданэкъо Мурат ягъусэу, агъэхьазырыгъэ тхылъым игугъу къышIыгъ. Ар 2020-рэ илъэсым Германием къыщыдагъэкIыгъ. 2021-рэ илъэсым Адыгэ Республикэм и Къэралыгъо шIухьафтын къыфагъэшъошагъ. Ащ Iоф дэзышIагъэхэм зэкIэми зэрафэразэр, экологие шIэ­ныгъэм хэхъоныгъэхэр ышIынхэмкIэ мэхьанэшхо зэриIэр ректорым къыхигъэщыгъ.
Адыгэ къэралыгъо университетым иректорэу Мамый Даутэ, Абхъазым шIэныгъэхэмкIэ и Академие ивице-президентэу Январби Экба, Мос­ква къэралыгъо университетэу М. В. Ломоносовым ыцIэ зыхьырэм иIофы­шIэу Софья Киселевам, пшъэдэкIы­жьэу ыхьырэмкIэ гъунэпкъэ гъэнэфагъэ зиIэ обществэу «Лэгъонакъ» зыфиIорэм игенеральнэ пащэу Къэлэшъэо Инвер, конференциер зигукъэкIэу, профессорэу Беданэкъо Мурат нэужым къэгущыIагъэх.
МэфэкI зэхахьэм ыуж пленарнэ зэхэсыгъо яIагъ. Урысыем ишIэныгъэлэжь цIэрыIохэу Ирина Репинам, Сергей Лебедевым, Константин Кисловым докладхэр къашIыгъэх.
ДЕЛЭКЪО Анет.