АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, «ЩыIэныгъэм пае инфраструктурэр» зыфи­Iорэ лъэпкъ проектым къыды­хэлъытагъэу зэхащэгъэ мэкъэтынхэм Адыгеим щыщэу нэбгырэ 2082-м ехъу ахэлэжьэгъах.

ПсэупIэхэм яобщественнэ чIыпIэу зэтырагъэпсыхьащтхэр къыхахынхэм фэшI 2021-рэ илъэсым къыщыублагъэу мы Iофтхьабзэр Урысыем онлайн-шIыкIэм тетэу щызэхащэ. Нэбгырэ мин 20-м къыщымыкIэу зыдэсхэр ары ащ хэлажьэхэрэр. АдыгеимкIэ къалэу Мые­къуапэ, поселкэхэу Инэм, Яблоновскэр ары чIыпIэу гъэкIэжьын зищыкIагъэхэр къызщыхахыхэрэр.
Мыекъуапэ пштэмэ, къэлэдэсэу хэлэ­жьагъэм щыщэу 5181-мэ Хэгъэгу зэ­о­шхом хэкIодагъэхэм ясаугъэт зэхэт амакъэхэр фатыгъэх. Ар апэ ит. Ащ ыуж чылысэу Успение Пресвятой богородицы къыпэIулъ чIыпIэр къекIы, мэкъэ 4373-рэ иI, урамэу Шоссейннэм тет скверыр къыхэзыхыгъэр нэбгырэ 3110-рэ.
Къэлэ гъэпсыкIэ зиIэ Инэм псэупIэ коимкIэ къуаджэу БжыхьэкъоякIэм культурэм и Унэу дэтым дэжь щыт кIэлэцIыкIу джэгупIэм пэрытныгъэр ыIыгъ, нэбгырэ 328-мэ ащ амакъэхэр фа­тыгъэх.
Поселкэу Яблоновскэм иурамэу Космическэм тет унэу N 37-м дэжь щыIэ кIэлэцIыкIу-спорт площадкэр апэ ­ишъыгъ, мэкъэ 1561-рэ ащ фатыгъ. Ащ ыуж кIэкIэу ит, ар мэкъэ 1338-рэ, Лениным ыцIэ зыхьырэм иобщественнэ чIыпIэ. Джащ фэдэу урамэу Космическэм тетэу джыри зы площадкэ, Краснодарскэм тетэу ащ фэдэ чIыпIэ мэкъэтынхэм ахагъэлажьэх. Зым нэбгырэ 851-мэ, адрэм 834-мэ амакъэхэр афатыгъэх.
Шъугу къэдгъэкIыжьын, мэкъуогъум и 12-м нэс ахэр кIощтых. ШIоигъоныгъэ зиIэхэр мы ссылкэмкIэ хэлэжьэнхэ алъэкIыщт: zagorodsreda.gosuslugi.ru.
УФ-м псэолъэшIынымкIэ и Министерствэ къызэритыгъэмкIэ, зэпстэумкIи хэгъэгум зымакъэ щызытыгъэр нэбгырэ миллиони 9-м ехъу.