Сэнэхьат ухьазырыныгъэмкIэ шъолъыр программэу «Адыгеим и ЛIыхъужъхэр» зыфиIорэм ипхырыщын Адыгэ Республи­кэм щылъэкIуатэ.

ЖъоныгъуакIэм и 19 — 28-м программэм иедзыгъо анахь шъхьаIэр рекIокIыщт, очнэ шIыкIэм тетэу ащ хэлажьэхэрэм зэдэгущыIэгъухэр ада­шIыщтых.
Мы программэр зытегъэпсыхьагъэр хэушъхьафыкIыгъэ дзэ операцием хэлэжьагъэхэр къэралыгъо ыкIи муниципальнэ хэбзэ къулыкъухэм, къэралыгъо компаниехэм IэпэIэсэныгъэ, къулайныгъэ ахэлъэу Iоф ащашIэным фэгъэхьазырыгъэнхэр ары. Къэралыгъо гъэIорышIэным ыкIи общественнэ IофшIэным алъэныкъокIэ хэхъоныгъэ зышIы зы­шIоигъо ветеран ыкIи дзэкъулыкъушIи 150-мэ проектым хэлэжьэнхэмкIэ лъэIу тхылъхэр къатыгъэх.
Шъугу къэдгъэкIыжьын, УФ-м и Президентэу Владимир Путиным къахилъхьэгъэ федеральнэ программэу «ЛIы­хъужъхэм яуахът» зыфиIоу гъэрекIо щегъэжьагъэу агъэцакIэрэм епхыгъэу ащ пшъэрылъ къыгъэуцугъ шъолъырхэри мыщ фэдэ проектым игъэцэкIэн фежьэнхэу. Ащ къыдыхэлъытагъэу, АР-м и ЛIышъхьэу КъумпIыл Мурат иунашъокIэ шъолъыр программэу «Адыгеим и ЛIы­хъужъхэр» зыфиIорэм ипхырыщын фежьагъэх.
— Хэгъэгум иухъумакIо и Илъэс мы программэр зэрагъэцакIэрэр тидзэ­кIолIхэм IэпыIэгъоу аратырэм изы лъэ­бэкъоу щыт. Ахэр хэгъэгуми, япшъэрылъи зэрафэшъыпкъэхэр язекIуакIэкIэ къагъэлъэгъуагъ. ДзэкIолIхэм лIыхъужъныгъэу зэрахьэрэм къеушыхьаты тятэжъ пIэшъэ лIыбланэхэм якIэн къэухъумагъэ зэрэхъурэр, — къыIуагъ КъумпIыл Мурат.
ЗэхэщэкIо комитетым къызэритыгъэм­кIэ, программэм хэлэжьэрэ нэбгырэ пэпчъ ежькIэ гупсэф уахътэм телъытагъэу зэIукIэгъухэр зыщызэхащэщтхэр зэхагъэуцох.
ХэушъхьафыкIыгъэ дзэ операцием иветеран 26-мэ апэу очнэ зэдэгущыIэгъур акIущт, ащ хэти иIэпэIэсэныгъэ къыщигъэлъэгъон ылъэкIыщт. ЫпэкIэ щыIэгъэ едзыгъохэм апхырыкIыгъэхэр ары мыщ джы хэлажьэхэрэр.
Программэм текIоныгъэ къыщыдэзыхыщтхэм ацIэхэр мы илъэсым мэкъу­огъум и 27 — 30-м къаIощтых.
Мыекъопэ къэралыгъо университетым РАНХиГС-р иIэпыIэгъоу къэралыгъо къулыкъушIэхэм якомпетенциекIэ шъо­лъыр Гупчэ щагъэпсыгъ. Апшъэрэ еджа­пIэм программэу «Адыгеим и ЛIыхъужъ­хэр» щыгъэцэкIэгъэным фэгъэзагъэр научнэ IофшIэнымкIэ ыкIи инноваци­оннэ хэхъоныгъэхэмкIэ проректорэу Тать­я­на Овсянниковар ары. Мэхьанэшхо зиIэ гукъэкIыр пхырыщыгъэным ар Москва щыфеджагъ, ащ IэпэIэсэныгъэу, шIэныгъэу IэкIэлъхэр джы зэрифэшъуа­шэу щыIэныгъэм щигъэфедэщт.
— Ахэм сыхьат 500-м ехъу зытелъы­тэгъэ егъэджэнхэр шъолъыр Гупчэм къыщяжэх. Президент академием къыгъэуцугъэ пшъэрылъхэм адиштэу зыми фэмыдэ программэ ветеранхэм афызэхэдгъэуцуагъ, къэралыгъо гъэIорышIэнымкIэ шIэныгъэхэр ядгъэгъотыщтых, — къыIуагъ Татьяна Овсянниковам.
Iэшъынэ Сусан.