ЖъоныгъуакIэм и 21-р Адыгеими тихэ­гъэгуи ятарихъ тхьамыкIэгъо хъугъэ-шIа­гъэу хэхьагъэхэм зэу ащыщ. 1864-рэ илъэсым мыщ фэдэ мафэм я ХIХ-рэ лIэшIэгъум щыIэгъэ Кавказ заор ухыгъэ хъугъэ.
А тхьамыкIэгъошхом хэкIодагъэхэмрэ къиныгъоу къыздихьыгъэхэмрэ тыгу къэдгъэ­кIыжьхэзэ, къыткIэхъухьэрэ ныбжьыкIэ­хэмкIэ пшъэдэкIыжьышхо зэрэтхьырэр икъоу къыдгурыIозэ, мамырныгъэмрэ лъэпкъ зэгурыIоныгъэмрэ тиреспубликэ къыщыухъумэгъэнхэмкIэ тфэлъэкIырэр зэкIэ тэшIэ, гъэсэныгъэ, шIэныгъэ куу яIэным гъунэ лъытэфы, щыIэныгъэм чаныгъэ къыщызхагъэфэным, ны­дэлъфыбзэр, лъэпкъ культурэр, шэн-хабзэхэр къэухъумэгъэнхэм ныбжьыкIэхэр фэтэпIух. Кавказ заом ыуж Урысыем ицIыф лъэпкъы­бэмэ афэдэу, адыгэхэми тикъэралыгъо игъэпытэн яIа­хьышIу хашIыхьагъ. Адыгеим икIыгъэ дзэкIолI­хэм нэмыкI цIыф лъэпкъхэм къахэкIыгъэхэм ягъусэхэу нэмыц техакIохэр зэхагъэтэкъуагъэх, илъэс 80-кIэ узэкIэIэбэжьмэ ТекIоныгъэшхор къыдахьыгъ.
ХэушъхьафыкIыгъэ дзэ операцием непэ хэлэжьэрэ тидзэкIолIхэр ятэхэм, ятэжъхэм, ятэжъ пIашъэхэм щысэ атырахызэ, Украинэм инеонацистхэм пхъашэу язаох, шъхьафит ашIыжьырэ чIыпIэхэм Урысыемрэ Адыгеимрэ я Къэралыгъо тамыгъэхэр ащагъаIэх, тихэгъэгурэ республикэмрэ ябыракъхэр зытет сурэтхэр аIэгъуапэхэм атырадэ. ЯдзэкIолI пшъэрылъхэр ахэм еIолIэнчъэу зэрагъэцакIэрэм къегъэлъагъо Урысыер нахь къэралыгъо пытэ хъугъэу тлъэгъумэ зэрэтшIоигъор.
ТичIыпIэгъу лъапIэхэр!
ТиблэкIыгъэ зыщыдгъэгъупшэ хъущтэп, ау ащ дакIоуи пшъэрылъ шъхьаIэу тиIэр таужкIэ къикIыщт лIэужхэм янеущырэ мафэ дэгъуным, гупсэфыным тафэлэжьэныр, Адыгеим икультурэ-тарихъ, игушъхьэлэжьыгъэ бай, лIэшIэгъубэмэ къазэпырахыгъэ лъэпкъ культурэр, бзэр, адыгэ шэн-хабзэхэр къэтыухъумэнхэр ары.
Псауныгъэ пытэ, насып, щыIэкIэшIу шъуи­Iэнэу, мамыр ошъогур ренэу шъуашъхьагъ итынэу, IофшIэнми, Адыгеимрэ Урысыемрэ яфедэ зыхэлъ ублэпIэшIу пстэуми гъэхъагъэхэр ащышъушIынэу тыгу къыддеIэу тышъу­фэлъаIо!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет – Хасэм и Тхьаматэу
Владимир Нарожнэр