Тыгъэр къыпфепсы, ­тыгъэр ощ пай
Адыгэ лъэпкъэу сыкъызхэкIыгъэр,
СыкъыоупчIы, непэ ухэт?
ЛIэшIэгъу миныбэу къызэпыпчыгъэр
Тарихъ мытхыгъэу гъэшIэ зэхэт.

Ухэт о сIомэ, адыгэ псалъэм
КъикIрэр умышIэу гъашIэр иохы.
Ухыорыпсэу тыгъэпс чIы налъэм
Уплъыр-гуплъырэу зышъхьэрэохы.

Шы чъэры Iэлэу, шы шъхьэрытIупщэу
Угуи тIупщыгъэу паIор пшъхьэрыс.
ЛъэпкъэгъукIэ узэу, умыз-мытIущэу
Щэрджэс-абдзахэу укъушъхьэрыс.

Шапсыгъэ тхышъхьэм укъыщечъэхышъ,
Бжъэдыгъу шъолъырыр къызэпыочы.
КIэмгуе шъофми исхэр о пшыхэшъ,
Ухэт ямыIоу сэлам яохы.

ТилIэшIэгъу тIокIэу непэ тызхэтым
УкъекIолIэфэ бэ ппэкIэкIыгъэр,
Хьадэгъу лъэмыджэу джа узытетым
ГъучI пчыпэ макIэп щызэпыпкIыгъэр.

УзэхаупкIатэу, узэхалIыхьэу
ЛIэныгъэ чIыпIэм бэрэ уифагъ.
Сыд фэдэу зашIми, узэпаплъыхьэу
Зы хымэ пыий уфэмыуфагъ.

Тыгъэм ифабэ зызэхэпшIагъэм
Къин умылъэгъоу сфэмыIошъун.
ШIугъэр унапэу дунэе гъашIэм
Игъогу мыпсынкIи урыкIошъун.

Зэкъошныгъэр уичIы щэбагъо,
Лъэпкъ зэдэIужькIэ непэ убай,
Ощ пае тыгъэр, тыгъэр зэпагъоп,
Тыгъэр къыпфепсы, тыгъэр ощ пай.
1955.

Адыгэ гущыIэжъхэр
ЧIылъэ лъынтфэхэу лъагъохэр
Сигъозэ мафэ зысфэхъурэм,
Мэзэгъо чэщым жъуагъохэр
КъыхэлыдыкIхэу зыслъэгъурэм,

Зитыжьыныпси Iушъашъэу
Мэзэ губзыгъэу зыкIутрэм
Сичъыг бырабэу, сыпкIашъэу
УипчъэIупэ сызIутрэм,

Адыгэ псалъэу псэлъэжъхэр
ОшIэ-дэмышIэу гум къэкIых,
Тарихъ хэдыкIхэу IэмышIхэр
ГъашIэм ижабзэу бзэ хэкIых.

IэкIэ мытхыгъэу гупшысэр
Ос шъэбэ псынкIэу къызесрэм,
Сэмэ зэтелъэу сипшысэ
Шыуш шэсыгъэу къызысрэм,

СшIэрэп зэрэхъурэр мыщ дэжьым
Осэпс хэгъуашъхьэр сикIуапIэу,
ПIэлъэ нэфылъэу пчэдыжьым
Ижьырытэджи сигуапэу,

Адыгэ псалъэу псэлъэжъхэр
ОшIэ-дэмышIэу гум къэкIых.
Тарихъ хэдыкIхэшъ, IэмышIхэр
ГъашIэм ижабзэу бзэ хэкIых.
1954.

Адыгэ цый
Адыгэ цыеу цые къопэфыр,
Осы нэгуфым фэдэу уфыжь.
Джыгыты кIалэу кIэлэкIэ чэфыр
Гушхоу рызепщэу ылъы ущыщ.

Бзыу тэмапэу, лъатэу, быбатэу
Шыгъэчъэ плъырмэ ренэу уахэт,
Дахэм идахэр оркIэ рытIуатэу
Жьы псынкIи, машIуи тIуми уафэд.

Типшъэшъэ гуахьмэ нэфылъы шэплъым
УтфыхабзыкIышъ, пшысэу утфады.
Хьазыр пшIыкIутIоу бгъэгупэм хэлъым
Тхыдэбэ Iаджи тарихъым щаты.

Къушъхьэ лъэгъуабэу джа мэстэ ужхэр
Ечъэх-дэчъаеу цыем къыхэщы,
Бгырысы нартхэу уицIыфы лъэшхэр
ЛIэшIэгъу зэлъыкIоу шIугъэм фэощэ.

ЛIыгъи, гукъауи, гушIуи, гъэрыпIи
УищыIэныгъэ къыхэтэджыкIы.
Шъхьафитныгъэр ястыщтэп япIуи,
Уишылъэмакъи шIункIым хэджыкIы.

Жьыбгъами ппихэу, гын гъози ппыоу
Уипыймэ тхьапшрэ анэгу уиплъагъ,
Зауи, мызауи укъыщауIэу
Гу шIуцIэ тхьапшмэ узыщалъагъ.

Уишъхьарыхъони жьыбгъэм зэрихьэу
Шъхьафиты тыгъэм укъыдыкъокIы.
Сыдырэ чIыпIи лIыгъэр щызепхьэу
МашIуи ояли уашъхьарэсыкIы.

Типшысэ Iушмэ янэфи пхэтэу
ПсынкIагъэу пхэлъри ягухэлъ гугъ.
Узыфадыгъэр сэрыми, хэтми,
Зэрэ Кавказэу ыпкъы уекIугъ.
1955.