БлэкIыгъэ 2023 — 2024-рэ илъэсхэм ябюджет зыфэдагъэм, ар гъэфедагъэ зэрэхъугъэм зыщатегущыIэгъэхэ «публичнэ едэIунхэр» Адыгеим и Правительствэ зычIэт унэм тыгъуа­сэ щызэхащэгъагъэх.

Ащ хэлэжьа­гъэх АР-м и Къэралыгъо Совет – Хасэм и Тхьаматэ игуадзэхэу, мэкъумэщ политикэмкIэ, мылъку ыкIи чIыгу зэфыщытыкIэхэмкIэ, бюджет, финанс, хэбзэIахь ыкIи экономикэ политикэмкIэ, предпринимательствэмкIэ ыкIи IэкIыб зэпхыныгъэхэмкIэ комитетхэм япащэхэу Цэй Эдуардрэ Iэщэ Мухьамэдрэ, Парламентым идепутатхэм ащыщхэр, муниципальнэ образованиехэм, общественнэ организацие зэфэшъхьафхэм ялIыкIохэр, студентхэр, нэмыкIхэр.
АР-м и Правительствэ и Тхьаматэ игуадзэу, финансхэмкIэ министрэу Виктор Орловым къызэриIуагъэмкIэ, 2023 — 2024-рэ илъэсхэмкIэ зэхэт бюджетым хахъохэмкIэ иIахь сомэ миллиард 57-рэ миллион 212,9-рэ хъущтыгъ. Ащ щыщэу сомэ миллиард 31-рэ миллиони 158,5-р хэбзэIахьхэм ыкIи мыхэбзэIахьхэм къахэкIыгъагъ, сомэ миллиард 26-рэ миллион 54,4-р зымыгъэзэжьын мылъкоу къыхэлъхьагъэ хъугъагъ.
ХъарджхэмкIэ зэхэт бюджетыр сомэ миллиард 57-рэ миллиони 494-м ехъу­щтыгъ. Сомэ миллион 281,8-рэ щыкIагъэ иIагъ.
Министрэр хэушъхьафыкIыгъэу рес­публикэм ибюджет а илъэсхэмкIэ зыфэдагъэм къытегущыIагъ. Ащ хахъо­хэмкIэ иIахь сомэ миллиард 45-рэ миллион 233,3-рэ хъущтыгъ. Ащ щыщэу сомэ миллиард 21-рэ миллион 268-м ехъур хэбзэIахьхэм ыкIи мыхэбзэIахьхэм ателъытагъ, сомэ миллиард 23-рэ миллион 965,1-р зымыгъэзэжьын мылъку.
Ащ ихъарджхэр сомэ миллиард 47-рэ миллион 948,4-рэ зэрэхъущтыгъэхэр, щыкIагъэу сомэ миллиарди 2-рэ миллион 715,1-рэ фэхъугъагъ.
Министрэр къызэгущыIэм ыуж упчIэхэр къыратыгъэх. Къэралыгъо программэхэм, проектхэм япхырыщын пэIухьэрэм, бюджет ахъщэм игъэфедэнкIэ цIыфхэр кIэщакIо зыфэхъу­хэрэм (инициативное бюджетирование) ягъэцэкIэн, хэбзэIахьэу бюджетым къыхахъорэм, нэмыкIхэм ахэр афэгъэхьыгъагъэх.
Виктор Орловым къызэриIуагъэмкIэ, «инициативнэ бюджетированием» гъэрекIо сомэ миллион 50,5-рэ пэIуа­гъэхьагъ. АпэрапшIэу ащ пае сомэ миллион 30-м ехъу агъэнэфэгъагъэр, ау АР-м и ЛIышъхьэ пшъэрылъ къафишIи, ащ фэдизым ар нагъэсыгъагъ.
2025-рэ илъэсэу тызыхэтымкIи сомэ миллион 50 ащ пае загъэнафэм, республикэм ипащэ сомэ миллион 70-м ехъу аригъэшIыжьыгъ. КIэлэ­еджакIохэр кIэщакIо зыфэхъугъэхэм (школьное инициатирование) япхырыщын шъхьафэу къытегущыIэзэ, 2024-рэ илъэсым Кощхьэблэ районым иеджакIохэм ягукъэкIхэм пэрытны­гъэр аубыти сомэ мин 350-рэ зэрафатIупщыгъэр къыIуагъ.
ХЪУТ Нэфсэт.