Типочтальон кIэух едзыгъом зыщеушэты
«Народнэ почтальоным» икъыхэхын фэгъэхьыгъэ интернет-мэкъэтыныр жъоныгъуакIэм и 12-м рагъэжьагъ. Адыгеим ыцIэкIэ зэнэкъокъум хэлажьэ Мыекъопэ районым ит къутырэу Северо-Восточные Сады дэт почтэм икъутамэу 385768-м иIофышIэу, финалым ихьагъэу Ирина Власовар.
Социальнэ хъытыоу «ВКонтакте» инэкIубгъоу «Урысыем и Почтэ» зыфиIорэмкIэ нэбгырэ мин 50-м шIомыкIэу зыдэс псэупIэхэм япочтальонхэу зэнэкъокъум хэлажьэхэрэм Урысыем щыпсэухэрэм амакъэхэр афатын алъэкIыщт. Почтальонхэу мэкъэтыным хэлажьэхэрэр мыщ ыпэкIэ щыIэгъэ шъолъыр зэнэкъокъухэм текIоныгъэ къащыдэзыхыгъэхэр ары.
Илъэс 28-м ехъугъэу Ирина Власовам почтэм Iоф щешIэ. IэпэIэсэныгъэ ин IэкIэлъ, ар къэзыушыхьатырэ щытхъу ыкIи рэзэныгъэ тхылъхэр мымакIэу къыфагъэшъошагъэх. Зыкъыфэзыгъазэхэрэм ишIуагъэ аригъэкIыныр шэнышIу фэхъугъ, чIыпIэу зэпхыгъэм щыпсэухэрэр, ахэм янахьыбэр пенсионерых, сыд фэдэрэ лъэныкъокIи джэуапынчъэу къыгъанэхэрэп.
ЖъоныгъуакIэм и 12-м къыщегъэжьагъэу мэкъуогъум и 5-м нэс почтальонхэм ащыщэу зы нэбгырэм шъумакъэ фэшъутын шъулъэкIыщт мыщ фэдэ ссылкэхэмкIэ: ДФО-м, СКФО-м, ЦФО-м ыкIи ЮФО-м яфиналистхэр: clck.ru/3Lzkkk. ПФО-м, СЗФО-м, СФО-м, УФО-м яфиналистхэр: clck.ru/3Lzkmt.
Урысые зэнэкъокъоу «Къоджэ почтальон» зыфиIорэр партиеу «Единэ Россиер», «Урысыем икъуаджэхэр» ыкIи «Урысые Почтэр» иIэпыIэгъухэу къоджэ ныбжьыкIэхэм я Урысые союз апэрэу регъэкIокIы. ЗэкIэмкIи тикъэралыгъо ишъолъыр 86-рэ мыщ хэлажьэ. Апэрэ едзыгъом зэнэкъокъум зыщаушэты ашIоигъоу лъэIу тхылъ мини 3-м ехъу къаIэкIэхьагъ. Финалым нэбгырэ 86-рэ ихьагъ. Очнэ шIыкIэм тетэу зэнэкъокъум икIэух мэкъуогъум и 5-м Москва щыкIощт, текIоныгъэ къыдэзыхыгъэхэр мэкъуогъум и 6-м зэхащэщт къоджэ псэупIэм иIофышIэхэм я Форум хахьэу лъэпкъ гупчэу «Урысыем» щагъэшIощтых.
Зэнэкъокъум текIоныгъэ къыщыдэзыхыгъэм ахъщэ шIухьафтынэу сомэ мин 250-рэ, интернет-мэкъэтынымкIэ «Народнэ почтальонэу» къыхахырэм сомэ мини 150-рэ аратыщтых.