Адыгэ Республикэм зэгъэшIужь юстициер иIэ зыхъугъэм ия 25-рэ илъэс фэгъэхьыгъэ зэIукIэ АР-м и Правительствэ зычIэт унэм щыкIуагъ. Адыгеим и ЛIышъхьэу КъумпIыл Мурат ащ хэлэжьагъ.

Ащ къекIолIагъэх АР-м и Къэралыгъо Совет – Хасэм и Тхьаматэу Владимир Нарожнэр, федеральнэ инспектор шъхьа­Iэу Сергей Дрокиныр, АР-м икъэралыгъо упчIэжьэгъоу ТхьакIущынэ Аслъан, Адыгеим ихьыкумышI системэ иветеранхэм я Совет итхьаматэу Трахъо Аслъан, АР-м ихьыкумышIхэм я Совет итхьаматэу Екатерина Богатыревар, АР-м и Къэралыгъо Совет — Хасэм идепутатхэм ялIыкIохэр, Адыгеим и ХьыкумышI департамент и ГъэIорышIапIэ, АР-м изэгъэшIужь хьыкумышIхэм яIофшIэн зэхэщэгъэнымкIэ ГъэIорышIапIэм япащэхэр, хьыкумышI системэм иветеранхэр ыкIи иIофышIэхэр.
АР-м и Апшъэрэ хьыкум и Тхьаматэу Шумэн Байзэт Iофтхьабзэр зэрищагъ. Ащ ипсалъэ къыщыхигъэщыгъэх Адыгеим изэгъэшIужь хьыкумышIхэм яинститут иуцункIэ ыкIи ихэхъоныгъэкIэ лъэхъэнэ шъхьаIэхэу къыхэфагъэхэр.
Ащ нэужым Адыгеим и ЛIышъхьэ къэзэрэугъоигъэхэм шIуфэс къарихыгъ. КъумпIыл Мурат къызэрэхигъэщыгъэмкIэ, 1998-рэ илъэсым Урысыем зэгъэшIужь хьыкумышIхэм яинститут зэрэщызэхащэжьыгъэр хьыкумышI реформэу хэгъэ­гум щыпхыращырэм ичэзыу шъхьаIэхэм зыкIэ ащыщ хъугъэ.
«Адыгэ Республикэм игъэцэкIэкIо, ихэбзэихъухьэ ыкIи ихьыкумышI къутамэхэм зэгъусэхэу зэдагъэцэкIэрэ Iофым тегъэпсыхьагъэу республикэ законхэу зэгъэшIужь хьыкумышIхэмрэ хьыкумышI участкэхэмрэ яIофшIэн зэрэзэхэщэгъэщтым телъытэгъэ Iофтхьабзэхэр Адыгеим щызэшIуахыгъэх. 2000-рэ илъэсым чъэпыогъум и 3-м Адыгэ Республикэм и Къэралыгъо Совет — Хасэм ия 57-рэ сессие апэрэ зэгъэшIужь хьыкумышI 20-р щаухэсыгъагъ», — къыIуагъ КъумпIыл Мурат.
Республикэм и ЛIышъхьэ хэушъхьафыкIыгъэу къатегущыIагъ Урысыем и Президентэу Владимир Путиным къыгъэ­уцугъэ пшъэрылъхэу зэгъэшIужь хьыкумышIхэм чIыпIэхэм къарытэджэрэ зэгурымыIоныгъэхэр зэфагъэ хэлъэу зэшIохыгъэнхэмкIэ мэхьанэу яIэм зэрэхахъорэм.
Республикэм и ЛIышъхьэ къызэриIуа­гъэмкIэ, цIыфхэм хьыкумышI къулыкъу-­хэм зафагъэзэным иамал нахь зызэриушъомбгъурэм, унагъохэм къарытэ­джэрэ зэгурымыIоныгъэхэр псынкIэу ыкIи тэрэзэу зэшIохыгъэнхэм мэхьанэшхо яI, граждан обществэр ыпэкIэ лъыкIотэнымкIэ, къэралыгъом иправовой лъапсэхэр гъэпытэгъэнхэмкIэ ащ ишIуагъэ къэкIо. ГущыIэм пае, илъэсэу икIыгъэм зэгъэшIужь хьыкумышIхэм яучасткэхэм Iофэу защыхэплъагъэхэр мин 27-кIэ нахьыбэ хъугъэх ыкIи Iоф мини 130-м шъхьадэкIыгъэх.
«ЦIыфхэм алъэгъу хэбзэгъэуцугъэу щыIэхэмрэ шапхъэхэмрэ кIуачIэ зэряIэр, язекIуакIэхэм афэхъун ылъэкIыщт кIэуххэри къагурэIох, обществэм хэлъ шэпхъэ гъэнэфагъэхэм лъытэныгъэ афэшIыгъэным зыфагъасэ. ХьыкумышIхэм Iоф зэрашIэрэм бэкIэ елъытыгъэх социальнэ щыIакIэм илъэныкъо зэфэшъхьафхэм язытет зыфэдэщтыр ыкIи цIыфхэр правовой лъэныкъомкIэ ухъумагъэ зэрэ­хъущтхэр», — къыIуагъ КъумпIыл Мурат.
ЗэгъэшIужь хьыкумышIхэм яIофшIэн зэрэкъиныр ыкIи мэхьанэшхо зэриIэр хигъэунэфыкIызэ Адыгеим и ЛIышъхьэ къыхигъэщыгъ гуетыныгъэ ахэлъэу Iоф зэрашIэрэм пае зэгъэшIужь юстицием иIофышIэ пстэуми зэрафэразэр, псауныгъэ пытэ яIэнэу, яIофшIэнкIэ гъэхъагъэхэр ашIынэу ар афэлъэIуагъ.
ЗэIукIэм къыщыгущыIагъэх Владимир Нарожнэр, Трахъо Аслъан, Екатерина Богатыревар. ЗэгъэшIужь хьыкумышIхэу, ахэм яIэпыIэгъухэу, хьыкумышIхэм язэхэ­сыгъохэм ыкIи яучасткэхэм ясекретарьхэу IофшIэнымкIэ гъэхъэгъэшIухэр зы­шIыгъэ­хэм афагъэшъошагъэх Адыгеим и ЛIы­шъхьэ и Рэзэныгъэ тхылъхэр, щытхъу тамыгъэу «Закон. Пшъэрылъ. ЦIыфыгъ» зыфиIорэр, республикэм и Къэралыгъо Совет – Хасэм, АР-м и Апшъэрэ хьыкум ятынхэр ыкIи ярэзэныгъэ тхылъхэр, УФ-м и Апшъэрэ хьыкум и ХьыкумышI департамент итынхэр.

АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.