МэшIоку гъогухэр щынэгъончъэнхэу
«МэшIокухэм гъогу яшъут» зыфиIорэ Iофтхьабзэр Темыр-Кавказ магистралым жъоныгъуакIэм и 1-м щаублагъ.
Мыщ фэгъэхьыгъэ къэбар- мэкъэгъэIу IофшIэныр мэшIоку гъогум икъулыкъушIэхэм гъэмэфэ зыгъэпсэфыгъохэм япэгъокIэу Темыр-Кавказ ыкIи Къыблэ федеральнэ шъолъырхэм якъалэхэм ыкIи япсэупIэхэм ащызэхащэ. ЕджапIэхэм ыкIи кIэлэцIыкIу IыгъыпIэхэм ялIыкIохэм пэшIорыгъэшъ Iофтхьабзэхэр адызэрахьащтых. Анахьэу мэшIоку гъогум тетхэу шъобж зытещагъэ хъугъэ Iэтахъохэр зыщеджэхэрэ еджапIэхэм анаIэ атырагъэтыщт.
Мазэрэ кIощт Iофтхьабзэм хахьэу узыгъэгъозэрэ буклетхэр, видео къэгъэлъэгъонхэр агъэфедэщтых. МэшIоку гъогум иIофышIэхэм депом, вокзалхэм ыкIи нэмыкI чIыпIэхэм кIэлэеджакIохэр зекIо ащэщтых.
Джащ фэдэу транспорт полицием икъулыкъушIэхэр ягъусэхэу мэшIоку зэпырыкIыпIэхэу гъогурыкIоным ишапхъэхэр нахьыбэу зыщаукъохэрэм дэкIыгъо Iофтхьабзэхэр ащызэхащэщтых.