КIэлэегъаджэу Iоф пшIэныр сыд фэдэрэ уахъти къызэрыкIоп, ау къэралыгъом, общест­вэм анахь ящыкIэгъэ сэнэхьатхэм сыдигъуи ащыщ. ШIэныгъэ куухэр пIэкIэлъынхэ зэрэфаем дакIоу, пшъэдэкIыжьышхо зэрэпылъыри къыбгурыIон фае.

Ебгъаджэхэрэм, ны-тыхэм, Iоф зыдапшIэхэрэм уагурыIоныр, шъхьэкIафэ къыпфашIыныр зымыуасэ щыIэп. Ар къыдэхъугъ непэ зигугъу къэтшIыщт бзылъфыгъэм.
Мамыщ Жаннэ Мурат ыпхъур Кощ­хьэблэ районым ипсэупIэу Вольнэм дэт гурыт еджапIэу N 9-м икIэлэегъадж, тарихъыр арегъэхьы. ЦIыфышIу, гукIэгъу хэлъ, ригъаджэхэрэм шIэныгъэ куухэр зэраригъэгъотыщтым, зэрагурыIощтым пылъ. Адрэхэми ар зэхашIыкIы, якIэлэегъаджэ зыпашIын щыIэп. ЗэкIэми зэфэдэу афыщыт, зэфагъэ хэлъ, къыIуа­тэрэр ашIогъэшIэгъоныным фэшI непэ щыIэ амалыкIэхэр егъэфедэх. Иурокхэм узыIэпащэу, уишIэныгъэхэм ахэбгъэ­хъоным узэрэфащэрэр кIэлэеджакIохэм къыхагъэщы.
Жаннэ кIэлэегъэджэ къодыеп, ар кIэлэпIу, актер, сурэтышI ыкIи музыкант. Ипредмет хэшIыкIышхо зэрэфыриIэр, культурэшхо зэрэхэлъыр зэкIэми аIо.
УблэпIэ классхэм ауж кIэлэеджа­кIохэм къин алъэгъу, сыда пIомэ илъэсиплIым зэсэгъэхэ кIэлэегъаджэм ахэр етIупщых, нэмыкIхэм рагъэджэнхэ фаеу мэхъу. А лъэбэкъур нахь псынкIэ къа­фэхъуным Жаннэ Мурат ыпхъум ынаIэ тырегъэты, амалэу иIэмкIэ икIэлэеджа­кIохэм ишIуагъэ арегъэкIы, агу къыдещае. АщкIэ кIэлэеджакIохэри, ны-тыхэри лъэшэу къыфэразэх.
Зисэнэхьат хэшIыкIышхо фызиIэ
кIэлэегъаджэм тапэкIи гъэхъэгъэшIухэр ышIынхэу, игупсэ еджапIэ ыцIэ дахэкIэ раригъэIонэу фэтэIо.
Вэрэкъо Нэфсэт.
ЕджапIэм ипрофсоюз организацие итхьамат.