ГъогурыкIоныр щынэгъончъэнымкIэ Комиссием Мыекъуапэ иадминистрацие зэхэсыгъо щы­зэхищагъ. КIэлэцIыкIу ­гъогу-транспорт фыкъоныгъэ­хэм ар афэгъэхьыгъагъ.

Iофтхьабзэм хэлэжьагъэхэр анахьэу зытегущыIагъэхэр муниципальнэ образованием ишъолъыр авариеу щыхъухэ­рэм япчъагъэ, ахэм кIэлэцIыкIухэм фы­къоныгъэу ахахыхэрэр нахь макIэ шIыгъэнхэр, лъэпкъ проектэу «ЩыIэкIэ Iэрыфэгъур» зыфиIорэм ипхырыщын, гъогухэр зэтегъэпсыхьэгъэнхэр ыкIи урамхэр къэгъэнэфыгъэнхэр ары.
Республикэм икъэлэ шъхьаIэ игъогу­хэм язытет къытегущыIагъ Къэралыгъо автоинспекцием икъэлэ отдел ипащэу Виталий Загайко. Гъогу-транспорт хъугъэ-шIагъэхэр нахь макIэ шIыгъэнхэм пае зэрахьэрэ Iофтхьабзэхэм ар къащыу­цугъ. Анахьэу зигугъу къышIыгъэр кIэлэ­цIыкIухэм фыкъоныгъэу ахэм ахахырэм къыщыгъэкIэгъэным зэрэдэлажьэ­хэрэр ары.
Къэралыгъо автоинспекторхэм къызэ­рэхагъэщыгъэмкIэ, къалэм щыхъурэ ава­риехэм янахьыбэр къызхэкIырэр ыпэкIэ къикIырэ автомобилым илъэныкъо зэрэтехьэхэрэр, псынкIэу зэрэчъэхэ­рэр, лъэсрыкIо зэпырыкIыпIэхэм шапхъэ­хэр бгъуитIуми зэраукъохэрэр ары.
Джащ фэдэу зэхэсыгъом анаIэ зыщытырадзагъэхэм ащыщ зыныбжь имыкъугъэхэм зефэнымкIэ ищыкIэгъэ фитыныгъэр ямыIэу, зыухъумэхэрэ шъуа­шэхэр ащымыгъхэу мототранспортыр зэрагъэIорышIэрэр.