Адыгеим кIэлэцIыкIу гъогу-­транспорт фыкъоныгъэхэр къы­щымыгъэхъугъэнхэм фытегъэпсыхьэгъэ Iофтхьабзэу рагъэ­кIокIыщтхэм къады­хэлъы­тагъэу, республикэ зэнэ­къо­къоу «Щынэгъончъэ щэрэхъ-2025» зыфиIорэр ­Мыекъуапэ щыкIуагъ.

Илъэси 10 — 12 зыныбжь кIэлэ­еджэкIо 40 Iофтхьабзэм зэрипхыгъэх, ахэр зэнэкъокъум имуниципальнэ едзы­гъохэм текIоныгъэ къащыдэзыхыгъэхэр ары. Командэ пэпчъ нэбгыриплI хэтыгъ.
МэфэкI шIыкIэм тетэу инспектор ныб­жьыкIэхэм къафэгушIуагъэх АР-м гъэсэныгъэмрэ шIэныгъэмрэкIэ иминистрэ игуадзэу Артем Журавель, гъогурыкIоныр щынэгъончъэнымкIэ Къэралыгъо автоинспекцием и ГъэIорышIапIэу АР-м щыIэм пропагандэмкэ иотдел ипащэу, полицием иподполковникэу Бзэджэжъыкъо Мурат, кIэлэцIыкIухэм яфитыныгъэхэр къэухъумэгъэнхэмкIэ Уполномоченнэу Наталья Агеевар.
— Анахь ухьазырыныгъэ дэгъу зы­хэлъ командэр непэ къыхэтхыщт, ащ Адыгеир Урысые зэнэкъокъум ифинал къыщигъэлъэгъощт. ТапэкIи гъэхъагъэхэр шъушIыхэу, къэблэгъэрэ гъэмэфэ зыгъэ­псэфыгъо мафэхэр чэфэу, сакъыныгъэ шъухэлъэу жъугъэкIонхэу, гъогурыкIоным ишапхъэхэр шIокI имыIэу жъугъэцэкIэнхэу шъуфэтэIо, — къыIуагъ Бзэджэ­жъыкъо Мурат.
Наталья Агеевам ныбжьыкIэ инспекторхэм закъыфигъазэзэ, шIэныгъакIэхэр, ныбджэгъукIэхэр агъотынхэу къафэлъэ­Iуагъ. ШIэныгъэу зэрагъэгъотыхэрэр гъэ­мэфэ зыгъэпсэфыгъом къащышъхьэпэ­жьынхэу, тэрэзэу агъэфедэнхэу ари­Iуагъ.
Хэгъэгум иухъумакIо и Илъэсэу ыкIи Хэгъэгу зэошхом ТекIоныгъэр къызщыдахыгъэр илъэс 80 зэрэхъугъэм атефэу Iофтхьабзэр зэрэзэхащагъэм ныбжьыкIэхэм анаIэ тырарагъэдзагъ ыкIи мыгъэрэ зэнэкъокъум итворческэ гъэцэкIэнхэм а тематикэр ахагъэхьагъ. ГъогурыкIоным ишапхъэхэм хэшIыкIэу афыриIэр, пэрыохъухэр къыухьэхэзэ кушъхьэфа­чъэр дэгъоу зэрифэн зэрилъэкIырэр, творческэ номер нэбгырэ пэпчъ къыгъэлъэгъуагъ. Ащ дакIоу гъогу хъугъэ-­шIагъэхэм ахэфагъэхэм апэрэ медицинэ IэпыIэгъур зэрарагъэгъотыщт шIыкIэм зэрэфэкъулайхэр нэрылъэгъу къашIыгъ.
Анахь дэгъу хъунхэм командэхэр зэрафэлъэкIэу фэбэнагъэх. Ау ар зыфа­гъэшъошагъэр къалэу Мыекъуапэ хэ­хьэрэ поселкэу Севернэм игурыт еджапIэу N 27-р ары. Красногвардескэ районым ятIонэрэ чIыпIэр къыдихыгъ, Мыекъопэ районым къикIыгъэхэр ящэнэрэ хъугъэх.
Урысые зэнэкъокъоу «Щынэгъончъэ щэрэхъ-2025» зыфиIорэм ифинал Адыге­ир къыщигъэлъэгъощт поселкэу Севернэм иеджапIэ иинспектор ныбжьыкIэхэм яотряд (ЮИД).
Iэшъынэ Сусан.