Урысыем и Следственнэ комитет Адыгэ РеспубликэмкIэ иследственнэ гъэIорышIапIэ иотделэу мэхьанэшхо зиIэ уголовнэ Iофхэр зэхэзыфырэм иследовательхэм Урысые Федера­цием и Уголовнэ кодекс ия 159-рэ статья ия 3-рэ Iахь зигугъу къы­шIырэ бзэджэшIагъэ зезыхьэгъэ (ахъщэшхо зиджыбэ изылъхьэгъэ) очылыр зэрэмысэр яматериалхэм къащагъэшъыпкъэжьыгъ.

Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ къа­IэкIигъэхьэгъэ материалхэм атетэу уголовнэ Iофыр къызэIуахыгъ.
Следствиемрэ хьыкумымрэ нафэ къызэрафэхъу­гъэмкIэ, юридическэ IэпыIэгъу зэраригъэгъоты-­
щтымкIэ очылым чIыпIэрысхэм 2023-рэ илъэсым итыгъэгъазэ зэзэгъыныгъэ адишIыгъагъ. ЧIыгу Iахьымрэ чIылъэ унэмрэ ямылъку унае зэрэхахьэхэрэр къэзыушыхьатырэ тхылъыр къаратынымкIэ ар Iэпы­Iэгъу афэхъунэу щытыгъ. Документхэр зеуплъэкIу нэуж хьэрамыгъэ дишхынэу очылым ыгу къэкIыгъ. Унэе мылъку зэряIэр тхыгъэнымкIэ ищыкIэгъэ документхэр икъоу щымыIэу, юридическэ хэукъоныгъэхэр ахэм ахашIыхьагъэу фэIо-фашIэхэр зыфигъэцэкIэрэ бзылъфыгъэм гуригъэIуагъ. Фитыныгъэхэр зытхырэ къулыкъумрэ нэмыкI хэбзэ къулыкъухэмрэ яIофышIэхэм сомэ мин 500 хъурэ къуалъхьэу аритыщтыр къыIэкIигъэхьанэу фигъэпытагъ. Ахъщэу къыритыгъэр ежь зэрэфаеу къызфигъэфедагъ.
Хьыкумым ышIыгъэ унашъом тетэу очылщтыгъэм илъэситIу пщыныжь условнэу тыралъхьагъ, очыл Iоф­шIэнхэр илъэси 2 ыгъэцэкIэн фимытэу ­агъэнэфагъ.

Урысыем щынэгъончъэнымкIэ
и Федеральнэ къулыкъу Адыгэ РеспубликэмкIэ
и ГъэIорышIапIэ ипресс-къулыкъу