ЩынэгъончъэнымкIэ Федеральнэ къулыкъум Адыгэ РеспубликэмкIэ и ГъэIорышIапIэ иматериалхэр IэубытыпIэ къызыфашIыхэзэ, поли­цием АдыгэкъалэкIэ имуниципальнэ отдел иследовательхэм Урысыем и Уголовнэ кодекс ия 159-рэ статья ия 3-рэ Iахь зигугъу къышIырэ бзэджэшIагъэ зезыхьагъэм уголовнэ Iоф къыфызэIуахыгъ.

Нафэ къызэрэхъугъэмкIэ, Теуцожь районым ис илъэс 50 зыныбжь бзылъфыгъэу чIыгу Iахьыр бэ­джэндэу зыштэгъагъэм 2022-рэ илъэсым хэбзэнчъэу ар ыIэ къыригъэхьанэу рихъухьагъ. Бэджэндэу аIи­хыгъэ чIыгу Iахьым унэ зэрэщыгъэпсыгъэм ехьылIэгъэ къэбар нэпцIхэр зэрыт техническэ планыр ащ къыз­IэкIигъэхьагъ. Джащ епхыгъэу зигугъу къэтшIыгъэ чIыгу Iахьыр иунэе мылъку хигъэхьанэу фитыныгъэ иIэ хъугъэ.
Хабзэу щыIэр ыукъозэ, бэджэндэу ыштэгъэ чIыгу Iахьыр зэрищэфыжьырэм фэгъэхьыгъэ лъэIу тхы-
лъыр бзылъфыгъэм арихьылIагъ. Къэбар нэпцIхэу аIэкIигъэхьагъэр IэубытыпIэ къызыфишIызэ, чIыпIэ зыгъэIорышIэжьынымкIэ къулыкъум дишIыгъэ зэзэ­гъыныгъэм тетэу кадастрэ уасэу сомэ 780159-рэ зиIэгъэ чIыгу Iахьыр хэбзэнчъэу ащ къызIэкIигъэхьагъ.
Джыдэдэм бзэджэшIагъэр зэрэзэрахьэгъэ шIыкIэм, ащ хэщэгъэн ылъэкIыщтхэм ягъэунэфын тегъэпсы­хьэгъэ Iофтхьабзэхэр хэбзэухъумэкIо къулыкъухэм зэрахьэх.
Урысыем щынэгъончъэнымкIэ
и Федеральнэ къулыкъу Адыгэ РеспубликэмкIэ
и ГъэIорышIапIэ ипресс-къулыкъу