ПэIудзыгъэ шIыкIэм тетэу Адыгеим щызэрахьэрэ бзэджэшIагъэхэм анахьыбэу къахагъэщырэр Интернет-сайтхэмкIэ гъэпцIагъэхэр зэрэзэрахьэхэрэр ары.

ЩакIохэм гъэпцIагъэ зэрахьэзэ цIыф­хэм цыхьэ къызфарагъэшIы, товарым ыкIи фэIо-фашIэхэм ауасэ цIыкIу ашIы, джащ фэдэу мэкъэгъэIухэр къатыгъух, ежьхэм яеу аIозэ ясайт нэкIубгъохэм къырагъахьэх.
ЩэфакIом товарыр пыутэу къызигъо­тыкIэ гуIэм хэтэу щакIом фытео, ар къызэрэзIэкIигъэхьан ылъэкIыщтым кIэ­упчIэ. НахьыбэрэмкIэ щакIом къареIо щэфакIохэр чэзыум хэтхэу, ащ пае товарым ыуасэ изы Iахь фыригъэхьан фаеу. Товарым ыуасэ елъытыгъэу ахъщэм ипчъагъэ зэфэшъхьафын ылъэ­кIыщт, осэ ин иIэмэ, мини 10 заулэм кIэхьащт. ЩэфакIом къыраIуагъэм фэдиз щакIом зыфыригъахьэкIэ, гъэпцIакIом зегъэкIодыжьы, заригъэгъотыжьырэп.
Джыри нэмыкI шIыкI. ЩакIом пцIы ыусызэ щэфакIом реIо нэмыкI къалэ щыIэу. Ар зыщыпсэурэм къэкIонышъ, товарыр ежь ышъхьэкIэ къыритыжьынэу егъэгугъэ, ау хьаулыеу къэмыкIоным фэшI товарым ыуасэ изы Iахь икартэ фыригъэхьанэу къыреIо.
Зыщыжъугъэгъупшэ хъущтэп щакIоу товарым изы Iахь къыкIэлъэIурэр гъэпцIакIоу щытын зэрилъэкIыщтыр. Ащы­гъум ащ шъуиахъщэ ыштэни зигъэбы­лъыжьыщт.
Ащ нэмыкIэу пцIыус щакIохэм щэфакIохэм араIо нэмыкI къалэм щыIэхэу ыкIи товарыр афэзыщэжьырэ къулы­къур къызфагъэфедэзэ аIэкIагъэхьажьын алъэкIынэу. Ащ пае щэфакIом ылъэкъуацIэ, ыцIэ, ятэ ыцIэ, зыщыпсэу­рэр, ителефон номер къыIахы. Нэужым курьер къулыкъум исайт иссылкэ фагъэхьы, банкым икартэкIэ товарым ыуасэ ытын фаеу раIо. ЩэфакIом ахъщэр зафыригъахьэкIэ, зэкъодзакIохэм загъэбылъыжьы.
АР-м хэгъэгу кIоцI IофхэмкIэ и Министерствэ цIыфхэм макъэ арегъэIу, пэIудзыгъэ шIыкIэм тетэу щэфэнхэ хъумэ гъэпцIакIохэм зарамыгъэгъэделэнэу.
Ащ пае шъушIэн фае:
— щакIохэм шъулъэкъуацIэ, шъуцIэ, шъуятэ ыцIэ, картэм ыкIыб тетхагъэр, электроннэ почтэр, СМС-мэ­къэгъэIум ипарольхэр ыкIи кодхэр яшъумыIох;
— СМС-мэкъэгъэIухэмкIэ къырагъэ­хьырэ ссылкэхэм шъуахэмыхь ыкIи шъуимынэIосэ программэхэр тешъумыгъэуцох;
— товарыр къызышъуIэкIахьэрэм ыуж ахъщэр зяшъутыщтыр, пэ­шIорыгъэшъэу ащ ыуасэ изы Iахь яшъумыт;
— шъуиахъщэ шъушIуатыгъугъэмэ псынкIэу полицием ителефон номе­рэу 02-м (102-м) шъутеу.