Адыгэ къэралыгъо автоинспекцием икъулыкъушIэхэмрэ ­Адыгеим иныбжьыкIэхэм я Союз хэтхэмрэ Мыекъопэ ­гуманитар-техническэ колледжым истудентхэм аIукIагъэх. Кушъхьэфачъэхэр, мототранспортыр зыгъэIорышIэрэ кIэлэцIыкIухэр гъогу хъугъэ-­шIагъэу зыхафэхэрэм, ащкIэ ­пэшIорыгъэшъ Iофтхьабзэу зэрахьэхэрэм ар фэгъэхьыгъагъ.

Адыгеим и Къэралыгъо автоинспекцие игъогу-патруль къулыкъу ибатальон ипащэ игуадзэу Чэтыхъу Руслъан Iоф­тхьабзэм хэлажьэхэрэм агу къыгъэкIы­жьыгъ лъэсрыкIохэм ыкIи транспортыр зыгъэIорышIэхэрэм алъэныкъокIэ гъогурыкIоным ишапхъэхэр зыфэдэхэр, гъогум сакъыныгъэ къыщызхагъэфэнэу ыкIи ащ тетхэм шъхьэкIафэ афашIынэу къяушъыигъ.
Анахьэу ынаIэ зытыридзагъэр зы­ныбжь имыкъугъэхэу мототранспортыр зыгъэIорышIэхэрэр ары. ЯщыIэныгъэкIэ ыкIи япсауныгъэкIэ ар щынагъоу зэрэщытыр къариIуагъ.
Джащ фэдэу Чэтыхъу Руслъан ныбжьыкIэхэм къафиIотагъ гъогу-патруль къулыкъум иIофшIэн зыфэдэр, ащ къулыкъу щыпхьыным шапхъэу пылъхэр.
Iофтхьабзэм икIэухым студентхэм яупчIэхэр гъогу-патруль къулыкъушIэм фагъэзагъэх ыкIи ахэмкIэ игъэкIотыгъэ джэуапхэр агъотыгъэх. Нэужым джэгукIэ шъуашэм илъ Iофтхьабзэр ныбжьыкIэ­хэм афызэхащагъ, ахэм гъогурыкIоным ишап­хъэхэр зэрашIэхэрэр ауплъэкIугъ. Адыгеим иныбжьыкIэхэм я Союз илIыкIохэм гъогурыкIоныр щынэгъончъэным фэгъэхьыгъэ узыгъэгъо­зэрэ тхьапэхэр студентхэм афагощыгъэх.
АР-м хэгъэгу кIоцI IофхэмкIэ и Министерствэ
и Къэралыгъо ­автоинспекцие ипресс-къулыкъу.