«ЩыIэныгъэм пае инфраструктурэр» зыфиIорэ лъэпкъ проектым хэхьэрэ федеральнэ проектэу Iэрыфэгъу къэлэ щыIакIэ гъэпсыгъэным фэгъэхьыгъэм къыдыхэлъытагъэу псэупIэхэм яобщественнэ чIыпIэу зэтырагъэпсыхьащтхэр къыхахынхэу зэхащэгъэ мэкъэтынхэр лъагъэкIуатэх.
Шъугу къэдгъэкIыжьын, 2021-рэ илъэ­сым къыщыублагъэу илъэс къэс ар зэхащэ, Урысыем ишъолъырхэм зэкIэми онлайн шIыкIэм тетэу ащэкIо. Нэбгырэ мин 20-м къыщымыкIэу зыдэсхэр ары ащ хэлажьэхэрэр. АдыгеимкIэ къалэу Мыекъуапэ, поселкэхэу Инэмрэ Яблоновскэмрэ чIыпIэу гъэкIэжьын зищыкIагъэхэр къызщыхахыхэрэр.
Мыекъуапэ пштэмэ, ащ щашIырэ чылысэу Успение Пресвятой богородицы къыпэIулъ чIыпIэр, Хэгъэгу зэошхом хэкIодагъэхэм ясаугъэт зэхэт къызэлъи­убытырэр ыкIи къалэм иурамэу Шоссейннэм тет скверыр зэнэкъокъум хагъэлэжьэнхэу къырагъэуцуагъэх.
АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, мэкъэтыным нэбгырэ 6588-рэ къэлэдэсэу хэлэжьэгъах. Ащ инахьыбэм, ар нэбгырэ 2813-рэ мэхъу, Хэгъэгу зэошхом хэкIодагъэхэм яса­угъэт зэхэт амакъэхэр фатыгъэх. Ащ ыуж урамэу Шоссейннэм тет скверыр къэкIы, чылысэу Успение Пресвятой богородицы къыпэIулъ чIыпIэм ящэнэрэ чIыпIэр еубыты.
Къэлэ гъэпсыкIэ зиIэ Инэм псэупIэ коимкIэ БжыхьэкъоякIэм культурэм и Унэу дэтым дэжь щыт кIэлэцIыкIу джэгупIэм пэрытныгъэр ыIыгъ. Къоджэдэсэу ар къыхэзыхыгъэр нэбгырэ 1566-рэ мэхъу.
Поселкэу Яблоновскэм иурамхэу Лениным ыцIэ зыхьырэм иобщественнэ чIыпIэрэ урамэу Краснодарскэм тет кIэлэцIыкIу ыкIи спорт площадкэхэмрэ хагъэлэжьэнхэу къыхахыгъэхэр. Лениным ыцIэ зыхьырэм иплощадь апэ ит, нэбгырэ 1010-мэ амакъэхэр ащ фатыгъэх.
Республикэм щыпсэоу мэкъэтынхэм ахэлэжьагъэр мы уахътэм нэбгырэ 11300-м ехъу. Мэкъуогъум и 12-м нэс ахэр кIощтых. ШIоигъоныгъэ зиIэхэр мы ссылкэмкIэ хэлэжьэнхэ алъэкIыщт: zagorodsreda.gosuslugi.ru.