Росреестрэм агу къегъэкIыжьы хэушъхьафыкIыгъэ дзэ операцием хэлажьэхэрэм ыкIи заом иветеранхэм фэгъэкIотэныгъэу яIэхэр.

Росреестрэм иунашъоу 2024-рэ илъэ­сым чъэпыогъум и 28-м къыдэкIыгъэм къызэригъэнафэрэмкIэ, зэо зэфэ­шъхьафхэм яветеранхэм, ащ хахьэх хэ­ушъхьафыкIыгъэ дзэ операцием хэлажьэ­хэрэр, 2025-рэ илъэсым щылэ мазэм и 1-м къыщегъэжьагъэу фэгъэ­кIотэныгъэ яIэу, ар процент 50 мэхъу, амыгъэкощырэ мылъкум изыкI къэралыгъо реестрэ зыщатхын алъэкIыщт.
Джащ фэдэу хэушъхьафыкIыгъэ дзэ операцием хэлажьэхэрэм ыкIи ахэм яуна­гъохэм социальнэ мэхьанэ иIэу чъыгхэтэ товариществэм гъэстыныпхъэ шъхъуан­тIэр аращэлIэнхэмкIэ кадастрэ IофшIэнхэм ягъэцэкIэн тефэрэ ахъщэр нахь макIэу къафалъытэщт.
Хэгъэгу зэошхом иветеранхэр кадастрэ учетым ыкIи амыгъэкощырэ мылъкум ифитыныгъэхэмкIэ къэралыгъо регистрацием хагъэуцохэ хъумэ зы IофшIэгъу мафэм ыкIи документыр зитыгъэм къыкIэлъыкIорэ мафэм къыриубытэу фэIо-фашIэхэр афагъэцэкIэнхэ фае. Ащ тефэрэ къэралыгъо пошлинэр ветеранхэм арагъэтыщтэп.
Джащ фэдэу Урысые кадастрэм иIофышIэхэр ветеранхэм адэжь кIохэзэ яфэIо-фашIэхэр ыпкIэ хэмылъэу афагъэцэкIэнхэу унашъом къыщеIо. Документэу хьазыр хъугъэхэр ыпкIэ хэмылъэу унэм къафащэжьыщт.