Хэгъэгу зэошхом ТекIоныгъэ къызщыдахыгъэм ия 80-рэ илъэс фэгъэхьыгъэ мэфэкI зэхахьэхэр Адыгеим щырагъэкIокIыгъэх.

Къэралыгъо хабзэм ыпкъ къикIыгъэмэ афэшъхьафэу, цIыф купхэми ежь-ежьырэу Iофтхьабзэхэр зэхащагъэх, заом щы­фэхыгъэхэр, тишъхьафитныгъэ фэбэнагъэхэр, хэгъэгур нэмыц техакIохэм къатезыхыжьыгъэ­хэр, лIыхъужъныгъэшхо зезыхьагъэхэр агу къагъэкIыжьыгъэх. Ахэм зэу ащыщыгъ Мыекъуапэ хэхьэрэ псэупIэу Гавердовскэм дэжь щыIэ ШIэжьым ипарк щыкIуагъэри. Ар зэхищагъ Джэ­джэхьаблэ щыщхэу къалэу Мые­къуапэ щыпсэухэрэм я Хасэ ипащэу Нэхэе Аслъан Анзаур ыкъом.
2014-рэ илъэсым Адыгэ Хасэм игъэцэкIэкIо комитет хэ­тыгъэ Хэкужъ Адам ары мыр зигукъэкIыгъэр, гектарныкъом ыубытырэ чIыгум чъыгаехэр щагъэтIысхьэгъагъэх. Хьакъуй Аскэр иунэе чIыгу щыщ Iахьэу Хасэм къыфыхигъэкIыгъэм а IофыгъошIур щагъэцэкIагъ. Кавказ заор ыкIи Хэгъэгу зэошхор заухыгъэхэр зэкIэлъыкIохэу илъэси 150-рэ ыкIи илъэс 70-рэ зэрэхъугъэхэм афэгъэхьыгъэу ШIэжь паркыр агъэпсыгъагъ. ЗэкIэмкIи ащ чъыгэе 220-рэ щагъэтIысхьэгъагъ, ащ хэкIодыкIыгъэхэм ачIыпIэ кIэхэр щагъэ­тIысхьажьхэу хъугъэ.
— ТекIоныгъэм и Мафэ тефэу тызызэхахьэм пхъэшъхьэ-мышъхьэ чъыгхэр паркым дэдгъэтIысхьагъэх. Тэгугъэ мы чIыпIэр къалэм изыгъэпсэфыпIэхэм ащыщэу, тетIысхьапIэхэр дэтхэу, лъэсгъогухэр иIэхэу, къы­дахьэрэмэ гухахъо щагъотэу тапэкIэ хъунэу. ДжырэкIэ тэ тиамалыр тэшIэ, тиныбджэгъухэр тиIэпыIэгъух, шъхьадж илъэкI елъытыгъэу ишIуагъэ къытегъэкIы. Ахэм ацIэ къесIон: Нэгъуцу Щамсудин, Бэгъушъэ Адам, Нэ­гъуцу Аслъан, Джанхъот Рэщыд, Джарымэкъо Хьис, Ламыкъо Эдуард, Бэгъушъэ Руслъан, МэщфэшIу Нэдждэт, Ахътэо Руслъан. Джы Кавказ заом ыкIи Хэгъэгу зэошхом хэкIодэгъэ тилIыхъужъхэм афэгъэ­хьыгъэ мыжъосынитIу мыщ дэдгъэуцонэу пшъэ­рылъ зыфэтэшIыжьы, — къыIотагъ Нэхэе Аслъан.
Зэхахьэм хэлэжьагъэхэр Хэгъэгу зэошхом хэкIодагъэхэм зы такъикъэ афэшъыгъуагъэх, жъамэ агъэугъ.