Творческэ куп зэхэтэу «Ошъадыр» Дунэе ныбжьыкIэ фестивалэу Шъачэ щыкIуагъэм хэлэжьагъ. Лъэпкъ культурэм идэхагъэ къашъохэмкIэ къыгъэлъэгъуагъ. Шъугу къэдгъэкIыжьын, ныбжьыкIэхэм я Дунэе фестиваль федеральнэ мэхьанэ зиIэ чIыпIэу «Сириус» зыфиIорэм щыкIуагъ.

УФ-м и Президентэу Владимир Путиным иунашъокIэ ар зэхащагъ. Адыгеим иныбжьыкIэ пэрыти 150-рэ Iофтхьабзэм хэлэжьагъ. Урысыем ыкIи IэкIыб къэралыгъуи 180-мэ къарыкIыгъэ лIыкIо мин 20 ащ къекIолIэгъагъ.
2024-рэ илъэсым мы фестивалым изыфэгъэхьазырынрэ изэхэщэнрэ творческэ куп зэхэтэу «Ошъадым» иIахьышIу хишIыхьагъ. Ащ фэшI УФ-м и Президентэу Владимир Путиным ыцIэкIэ медалэу «2024-рэ илъэсымкIэ ныбжьыкIэхэм я Дунэе фестиваль» зыфиIорэм щытхъу тхылъ голъэу къыфагъэшъошагъ.
АР-м иныбжьыкIэхэм я Комитет ипащэу Максим Галушкиныр культурэ хэхъоныгъэхэм я Гупчэу «Ошъад» зыфиIорэм щызэхащэгъэ Iофтхьабзэм къеб­лэгъагъ.
— Лъэпкъ культурэм идэхагъэ шэпхъэ­шIухэм адиштэу къизыIотыкIырэ «Ошъадым» сыфэгушIо. Адыгэ лъэпкъым икультурэ, ишэн-хабзэхэр зэрифэшъуашэу къэжъугъэлъэгъуагъ, ащ осэшхо къыфашIыгъ. УФ-м и Президентэу Владимир Путиным ыцIэкIэ къэкIогъэ медалымрэ щытхъу тхылъымрэ къышъосэтыжьых, — къыIуагъ Максим Галушкиным.
Творческэ купым хэт нэбгырэ 17-мэ шIухьафтын лъапIэр къалэжьыгъ.
— Дунэе ныбжьыкIэ фестивалэу Шъа­чэ щыкIуагъэм «Ошъадыр» хэлэжьагъ. Къэгъэлъэгъонхэм анэмыкIэу, фестивалым щызэIукIэгъэ артистхэр нэIуасэ зэфэхъугъэх, творческэ сэнаущыгъэмкIэ зэдэгощагъэх, егъэджэнхэр арагъэкIу­гъэх. Лъэпкъ зэкъошныгъэм, зыкIыныгъэм атегъэпсыхьэгъэ Iофтхьабзэхэм ахэлэжьагъэх. Дунаим тет лъэпкъ зэфэшъхьафхэм тиискусствэ нахьышIоу ашIэ зэрэхъурэм, адыгэхэм язэлъыIэсыкIэ амалхэр зэрэпытэхэрэм «Ошъадым» иIахьышIу хэлъ, — къыIуагъ АР-м изаслуженнэ артисткэу, Чэчэн Республикэм искусствэхэмкIэ изаслуженнэ IофышIэу, культурэ хэхъоныгъэхэм я Гупчэу «Ошъадым» ипащэу Едыдж Викторие.
— Къэшъо композициехэу «Удж-сэндракъыр», «Ритмы гор» зыфиIохэрэр, нэмыкIхэр фестивалым къекIолIэгъэ ныбжьыкIэхэм ашIогъэшIэгъоныгъ. ЗэIу­кIэгъубэмэ тахэлэжьагъ, нэIуасэ тызэ­фэхъугъ, шIэныгъакIэхэр зэдгъэгъоты­гъэх. Гум къинэжьырэ Iофтхьабзэу фестивалыр хъугъэ, — къыIуагъ купэу «Синдикэм» икъэшъуакIоу Хьабэчыр Эммэ.
«Ошъадым» хэхьэрэ къэшъокIо купэу «Синдикэм» ыкIи лъэпкъ фольклор-этнографическэ орэдыIо купэу «Ащэмэзым» фестивалым дахэу зыкъыщагъэлъэгъуагъ. Лъэпкъэу зыщыщхэм, динэу алэжьырэм, политикэм еплъыкIэу фыряIэм ямылъытыгъэу дунаим ичIыпIэ зэфэшъхьафхэм къарыкIыгъэ ныбжьыкIэхэр зэгурыIуа­гъэх. КъыткIэхъухьэрэ лIэужхэр Iофтхьэбзэ зэфэшъхьафхэм зэрахэлажьэхэрэм, гъэ­хъэгъэшIухэр зэрашIыхэрэм тагъэгушIо. НыбжьыкIэхэм ясоциальнэ проектхэм IэпыIэгъу агъотыным игугъапIэхэр щыIэх.
Лъэпшъыкъо Фатим.
Сурэтыр авторым ий.