АР-м мэкъумэщ хъызмэтымкIэ и Министерствэ тызэрэщигъэгъозагъэмкIэ, пхъэшъхьэ-мышъхьэ ыкIи мэркIо зэфэшъхьафхэр къащагъэкIыхэу гектар 4171,4-рэ республикэм непэ иI.

Ар 2025-рэ илъэсым ищылэ мазэ и 1-м нэс агъэунэфыгъэр ары. Ащ щыщэу гектар 266-м ехъур шъофхэм къащагъэкIырэ маркIохэм аубыты. Унагъохэм ящагухэм къащагъэкIырэри къы­хэлъытагъэмэ, пстэумкIи гектар 1838,2-рэ мэхъу.
Адыгеим апэу зыщызыушъомбгъугъэр ыкIи анахьыбэу къыщагъэкIырэр цумпэр ары. ГущыIэм пае, Красногвардейскэ районым мэкъумэщ чIыгоу иIэм ызыныкъу пIоми хъунэу ащ зэлъеубыты. Нахь кIасэу губгъо ыкIи мэз маркIохэм (земляника, ежевика) чIыгулэжьхэр ауж ихьагъэх. Илъэс зытфыхкIэ узэкIэIэбэжьмэ, тишъолъыр ичIыгухэм, тичIыопс зыпарэкIи къемыкIоу алъытэщтыгъэ голубикэр къырахьагъ, мыдэеуи зыщеушъомбгъу.

Непэ Адыгеир цумпэхэр, маркIохэр анахьыбэу Урысыем ибэдзэршIыпIэ изыщэрэ шъо­лъыр­хэм ащыщ. ТичIыгулэжьэу мы культурэхэм апылъхэм япродукцие къалэхэу Москва, Санкт-Петербург, Самарэ, Волгоград, ары пакIошъ, Новосибирскэ, Уренгой, нэмыкIыбэхэм ащыIуагъэкIы.
Мэкъумэщ хъызмэтыр зэрэщытэу пштэмэ, ащ хэхъоныгъэ­хэр ышIынхэм анахьэу фэIорышIэрэр къэралыгъо IэпыIэгъур ары. Пхъэшъхьэ-мышъхьэ, цумпэ ыкIи мэркIо къэгъэкIыным Адыгеим зыщиушъомбгъунымкIи ары анахьэу зишIуагъэ къэкIуагъэр.
АР-м мэкъумэщ хъызмэтымкIэ и Министерствэ тызэрэщигъэгъозагъэмкIэ, 2024-рэ илъэсэу кIуагъэм мы культурэхэм адэлажьэхэрэм агъэтIысхьащтхэм, чIыгъэшIоу аратыщтхэм атырагъэкIодэрэ мылъкум щыщ Iахь къегъэгъэзэжьыгъэным пстэумкIи сомэ миллион 90,7-м ехъу республикэм пэIуигъэхьагъ. 2025-кIэ сомэ миллион 296,1-рэ агъэнэфагъ.
— Адыгэ Республикэм социальнэ ыкIи экономикэ хэхъоныгъэхэр егъэшIыгъэнхэмкIэ унэе программэм къыдыхэлъытагъэу, 2025-рэ илъэсым щегъэжьагъэу фермерэу мэкъумэщ хъызмэтыр мылъку къэкIуапIэу къыхэзыхыгъэхэм егъэжьапIэ афэхъунэу грантхэр аратыщтых. МэркIо ыкIи хэтэрыкI къэгъэкIыным ыуж ихьэхэрэр ары ащ къыхиубытэщтхэр. Илъэсищ благъэм ащ сомэ миллион 300, илъэс къэс сомэ миллиони 100 республикэм пэIуигъэхьанэу ыгъэнэфагъ, — къыщаIуагъ Министерствэм.
Ащ нэмыкIэуи «Агростартап» зыфиIорэ къэралыгъо программэр щыI. Ари мэкъумэщ хъыз­мэтым зыфэзгъэзагъэхэм егъэ­жьапIэ ашIынэу грантхэр ятыгъэнхэм фытегъэпсыхьагъ. ГущыIэм пае, ащ къыдыхэлъытагъэу 2024-рэ илъэсым губгъо маркIом ыуж ихьэмэ зышIоигъо фермер 12-мэ ахъщэ IэпыIэгъу аратыгъ. Аужырэ илъэситIур пштэмэ, «Агростартапым» ишIуа­гъэкIэ предприниматель 85-рэ грантхэм къахиубытагъэх. Ахэм ащыщэу 25-р цумпэ ыкIи мэркIо къэгъэкIыныр ары зыпылъыр.
ХЪУТ Нэфсэт.
Сурэтхэр: Iэшъынэ Аслъан.