Медицинэ ыкIи фармацевтическэ гурыт гъэсэныгъэ зиIэ IофышIэ куп анахь дэгъур къызыщылъэгъогъэ зэнэкъокъу мы мафэхэм Адыгэ республикэ клиническэ сымэджэщым щыкIуагъ, отделение пэпчъ нэбгырищ хэлэжьагъ.

Лъэныкъуищэу гощыгъэу медицинэм иIофышIэхэм заушэтыгъ, анахь дэгъоу зыкъэзыгъэлъэгъуагъэхэр неврологиемкIэ отделением имедсестрахэр ары. ЯтIонэрэ хъугъэх нейрохирургиемкIэ отделением илIыкIохэр, ящэнэрэ чIыпIэр зэдагощыгъ гу-лъынтфэ хирургиемкIэ ыкIи травматологиемкIэ отделениехэм ямедсестрахэм.
НеврологиемкIэ отделением бэмышIэу тыщыIагъ, текIоныгъэ къыдэзыхыгъэхэм гущыIэгъу тафэхъугъ. Мыщ фэдэ Iоф­тхьэбзэ гъэшIэгъоным хэлэжьэнхэ амал яIэ зэрэхъугъэм зэрэрыгушхохэрэр ахэм къыхагъэщыгъ. ЯIофшIэнкIэ шIогъэ ин къэзытыщт лъэныкъохэр агу зэрэраубытагъэр медсестра ныбжьыкIэхэм къаIуагъ. Зэнэкъокъур зэхащэнымкIэ зиIахьышIу хэлъхэу сымэджэщым ипащэу Цуужъ Нателлэ, медсестрахэм Iоф адэшIэгъэнымкIэ пащэм игуадзэу Светлана Строкань, профсоюз организацием ипащэу Фатима Зубаревам ыкIи отделение зэфэшъхьафхэм ямедицинэ сестра шъхьаIэхэм зэрафэразэхэр къаIуагъ.

НеврологиемкIэ отделением имедсестрахэу Елена Кульбашевар, Оксана Гучапшевар, Брыцу Лианэ зэрифэшъуа­шэу зыкъагъэлъэгъуагъ. Ахэм къызэраIуагъэмкIэ, апэрэ уцугъом лабораторнэ диагностикэмкIэ шIэныгъэу яIэхэр къагъэлъэгъуагъэх. Нэужым псыпсыр уIагъэм зэрэтеплъхьащтымкIэ зэнэкъо­къугъэх. Ау анахь гъэшIэгъонэу алъытагъэр Хэгъэгу зэошхом илъэхъан медсестрахэм яIофшIэн зэрэзэхащэщтыгъэм фэгъэхьыгъэ къэгъэлъэгъонэу къашIыгъэхэр ары.
— Тинахьыжъхэр зэо лъэхъаным къинэу зыхэтыгъэхэр тынэ кIэкIыгъ. ДзэкIолIхэм ягъусэхэу медицинэм иIофышIэхэм пшъэ­дэкIыжьышхо ахьыщтыгъ. Тикъэгъэлъэгъон ар къищитIотыкIыгъ. Отделением Iут кIалэхэр ащкIэ IэпыIэгъу къытфэхъугъэх, ахэм уIагъэхэм фэдэу зыкъашIыгъ, апэрэ IэпыIэгъур ядгъэкIыгъ. Медсестрам иIоф­шIэн зэригъэцакIэрэм дакIоу гукIэгъуныгъэ къызхигъафэзэ иIофшIэн ыгъэцэкIэн фае, ари къыдэтлъытагъ, — къыIуагъ купым хэтэу Лианэ.
ТекIоныгъэр къыдахынымкIэ зиIа­хьышIу хэлъэу алъытэ отделением имедсестра шъхьаIэу ПIатIыкъо Раисэ. Ар медсестра ныбжьыкIэхэм сыдигъокIи IэпыIэгъу афэхъу, зэнэкъокъум хэлэ­жьэнхэм тыригъэгушIухьагъэх, зэри­фэшъуа­шэу ыгъэхьазырыгъэх ыкIи ахэм яшIэныгъэхэр къагъэшъып­къэжьыгъэх.
Ежь Раисэ медицинэм ищыIэныгъэ гъогу зырипхыгъэр илъэс 50 хъугъэ, ащ щыщэу илъэс 32-м медсестра шъхьаIэу Iоф ешIэ. Мыщ фэдэ зэнэкъокъухэм мэхьанэшхо зэряIэр ащ къытиIуагъ. Медсестрам иIофшIэн уасэу иIэр ныбжьыкIэхэм нахь къагурыIонымкIэ, яшIэныгъэхэм ахагъэхъонымкIэ, нэмыкI- хэм щысэ атырахынымкIэ, сэнэхьатым нахь фэщагъэ хъунхэмкIэ мыщ фэдэ зэнэкъо­къухэм яшIогъэшхо къакIоу ащ елъытэ.
НеврологиемкIэ отделением иIофы­шIэхэр зэкъотхэу, зэдеIэжьхэу зэрэщытым къыхэкIыкIэ текIоныгъэри къыдахыгъэу алъытэ, ащ рэгушхох.
ДЕЛЭКЪО Анет.

Сурэтхэр: неврологиемкIэ отделением ихъарзынэщ.