БзэджэшIагъэхэм ахащэх
АР-м хэгъэгу кIоцI IофхэмкIэ и Министерствэрэ ащ епхыгъэу Iоф зышIэрэ организациехэмрэ гъэпцIакIохэр цIыфхэм афытеонхэ амылъэкIыным фытегъэпсыхьэгъэ зэхэубытэгъэ Iофтхьабзэхэр зэрахьэх. Ащ къыпкъырыкIыхэзэ ежь бзэджашIэхэми шIыкIэ зэфэшъхьафхэр къагъотых, мессенджерым инэкIубгъохэр къызIэкIагъахьэх е ахэр бэджэндэу аштэх. Анахьэу кIэлэцIыкIухэр ыкIи Iэтахъохэр ахъщэм къырагъэнэцIыхэзэ ахэм янэкIубгъохэр агъэфедэх. Ау ахъщэ псынкIэ къагъахъэу аIозэ ныбжьыкIэхэр бзэджэшIагъэхэм ахэщагъэхэ зэрэхъурэр икъоу къагурыIорэп.
ГъэпцIакIохэм ныбжьыкIэхэр онлайн-джэгупIэхэм ячатхэм, сообществэхэм, зэлъашIэрэ блогерхэм якъэбар къезыгъэкIокIырэ нэкIубгъохэм къарагъуатэх. НэкIубгъохэр бэджэндэу аштэ хъумэ гъэпцIагъэ хэмылъэу ахъщэ къырагъэхъэн алъэкIынэу ашIошъ агъэхъу. Ау нэужым ахэмкIэ цIыфхэр агъэделэх, агъэщынэх, аумэхъыхэзэ зэфэшIыгъэ организациехэм ахащэх ыкIи къыхэкIы террористическэ мэхьанэ зиIэ бзэджэшIагъэхэр зэрахьэхэу.
НэкIубгъохэр агъэфедэзэ бзэджэшIагъэ зэрахьагъэу къызыхагъэщыкIэ, полициер апэу нэкIубгъор зием дэжь макIо. Мыщ дэжьым ар бэджэндэу зытыгъэр бзэджэшIагъэм хэщагъэ хъуным ищынагъо къэуцу. Хэбзэукъоныгъэу зэрихьагъэм ихьылъагъэ елъытыгъэу ащ хьапс тыралъхьан алъэкIыщт.
Мыщ фэдэ шIыкIэмкIэ ахъщэ зытыгъурэ зэхэщакIохэм щынэгъончъэу ыкIи псынкIэу ахъщэ къагъэхъэн алъэкIынэу цIыфхэм ашIошъ агъэхъузэ банкым исчетэу къызэIуахыгъэхэр къызIэкIагъахьэх. Нэужым ахэр къызфагъэфедэхэзэ хэбзэукъоныгъэхэр зэрахьэх.
НахьыбэрэмкIэ гъэпцIагъэ зэрэзэрахьэгъэ счетыр зытетхагъэхэм бзэджэшIагъэ зэрахьагъэу къеуцолIэжьхэрэп. Картэр ашIокIодыгъэу е нэмыкI горэм ращагъэу къаIо.
Къыгъэхъэн гухэлъ имыIагъэу лажьэ зэрахыгъэу дао къэзытыгъэм ахъщэр къыфызэкIэгъэкIожьыгъэным ехьылIэгъэ хьыкум практикэ щыIэ хъугъэ.
«Зэхэубытэгъэ Iофтхьабзэу зэрахьэхэрэм яшIуагъэкIэ бзэджашIэхэм банкым икартэ къызфагъэфедэзэ счетым ахъщэ зэрэрагъахьэрэм епхыгъэ хъугъэ-шIагъэхэм япчъагъэ нахь макIэ хъугъэ», — къыIуагъ Урысыем хэгъэгу кIоцI IофхэмкIэ и Министерствэ иофициальнэ лIыкIоу Ирина Волк.
ГущыIэм пае, Урысыем хэгъэгу кIоцI IофхэмкIэ и Министерствэ къэбар-коммуникационнэ технологиер хэбзэнчъэу зыгъэфедэхэрэм ябэныгъэнымкIэ и ГъэIорышIапIэ икъулыкъушIэхэм бзэджэшIэ купым иIофшIэн къызэтыригъэуцуагъ. Мыщ хэтхэм Телеграмым имессенджеркIэ охътэ гъэнэфагъэкIэ нэкIубгъом ихьагъэх. Мыщ фэдэ шIыкIэмкIэ хэбзэгъэуцугъэр зыукъорэ кол-гупчэхэр Украинэм ичIыпIэ зэфэшъхьафхэм ащагъэпсыхи, Урысыем ис цIыфхэм алъэныкъокIэ гъэпцIагъэ зыхэлъ бзэджэшIагъэхэр зэрахьагъэх.
Зэфэхьысыжьхэм къызэрагъэлъэгъуагъэмкIэ, 2024-рэ илъэсым Iоныгъом къыщыублагъэу 2025-рэ илъэсым гъэтхапэм нэс телеграм-каналым изы нэкIубгъокIэ аккаунт мин 11-м ехъу бзэджашIэхэм къызфагъэфедагъ. Купым хэтхэм Урысые Федерацием ичIыпIэхэм гъэпцIагъэ зыхэлъ бзэджэшIэгъэ миным ехъу порталэу «Къэралыгъо фэIо-фашIэхэр» зыфиIорэм щызэрахьагъ, зэрарыр сомэ миллион 400-м ехъу.
Зэгуцафэхэрэ зэхэщакIор ыкIи бзэджэшIэ купым хэтхэр Волгоградскэ ыкIи Свердловскэ хэкухэм къащаубытыгъэх. Мыхэм уголовнэ Iоф къафызэIуахыгъэу мы уахътэм зэхэфынхэр макIох.
КIАРЭ Фатим.