Мыекъопэ къэралыгъо технологическэ универ­ситетым и Дзэ егъэджэн гупчэ пчъэ зэIухыгъэ-
хэм ямафэ щыкIуагъ, республикэм икIэлэеджа­кIохэр ащ къырагъэблэгъагъэх, гущыIэгъу афэ­хъугъэх.

Урысые Федерацием и УIэшыгъэ КIуачIэхэм я Генеральнэ штаб и зэхэщэкIо-мобилизационнэ гъэIорышIэпIэ шъхьаIэ ипащэ игуадзэу Владимир Цимлянскэр Урысые кIэлэцIыкIу гупчэу «Смена» зыфиIорэм ипащэ игуадзэу Алексей Резник, «Роспатриотцентр» зыфиIорэм и ГъэIорышIапIэ иотдел ипащэу Дарья Матрешинар, Урысые организациеу «ДОСААФ-м» итхьаматэ иIэпыIэгъоу Амангильды Караменовыр, дзэ-патриотическэ IофшIэнымкIэ ыкIи общественнэ зэхахьэхэм адэлэжьэгъэнымкIэ ор­ганизацием иотдел иупчIэжьэгъоу Вячеслав Зелепукиныр, нэмыкIхэри Iофтхьабзэм къырагъэ­блэгъагъэх.
Зэхахьэм къыдыхэлъытагъэу непэрэ уахътэм диштэрэ дзэ ыкIи хэушъхьафыкIыгъэ техникэу дзэ гупчэм щагъэфедэхэрэр, цIыф зэ­рымыс быбырэ пкъыгъохэр, робототехникэ комплексхэр, Iэшэ зэфэ­шъхьафхэр къекIолIагъэхэм ара­гъэлъэгъугъэх. Джащ фэдэу егъэ­джэн шIыкIэу агъэфедэхэрэр, апэрэ IэпыIэгъум зэрэфагъасэхэрэр нэ­рылъэгъу афашIыгъэх, нэужым зы­щеджэхэрэр, лабораториехэр къарагъэплъыхьагъэх. Ана­хьэу анаIэ зытырадзагъэр цIыф зэрымыс пкъыгъохэу пыймэ агъэфе­дэхэрэм зэрапэуцужьыхэрэр ары.
ХьакIэмэ алъэгъугъэм осэшхо къыфашIыгъ, техническэ базэр уахътэм диштэу зэрэщытыр, студентэу рагъаджэхэрэм шIэныгъэ куухэр зэрарагъэгъотырэр къыхагъэщыгъ.
Мыекъопэ къэралыгъо техно­логическэ университетым и Дзэ егъэджэн гупчэ мэхьанэу иIэр джы­ри зэ къыхагъэщыгъ. Урысые Федерацием и УIэшыгъэ КIуачIэхэм къулыкъу ащызыхьыщтхэм ягъэхьазырынкIэ шъолъыр системэу ар щыт. Мыщ учIэхьаным пае шап­хъэу пылъхэр нэужым къаIотагъэх.
Мыекъопэ къэралыгъо технологическэ университетым ипресс-къулыкъу.