Уголовнэ Iоф къызэIуахыгъ
Джэджэ районым щыщ хъулъфыгъэу илъэс 56-рэ зыныбжьым гъэпцIагъэ къыдызэрахьагъэу полицием макъэ ригъэIугъ.
Ащ къызэриIуагъэмкIэ, мэфэ заулэкIэ узэкIэIэбэжьмэ ымышIэрэ горэ ителефон къыфытеуи финанс организацием иIофышIэу къыриIуагъ.
Джащ фэдэу хъулъфыгъэм икартэ илъ ахъщэр гъэпцIакIохэм ратыгъукIын гухэлъ яIэу, ащ щыухъумэгъэным фэшI ахъщэр «щынэгъончъэ счетым» ригъэхьан фаеу бзэджашIэм къыриIуагъ.
ЫмышIэрэ цIыфым цыхьэ фишIи, къыриIуагъэр зэкIэ ыгъэцэкIагъ, нэужым хъулъфыгъэм икартэ илъыгъэ сомэ мин 385-р рахыгъ.
Мы хъугъэ-шIагъэмкIэ уголовнэ Iоф къызэIуахыгъ. ГъэпцIакIом икъычIэгъэщын епхыгъэ оперативнэ-лъыхъун Iофтхьабзэхэр полицием икъулыкъушIэхэм зэрахьэх.
АР-м хэгъэгу кIоцI IофхэмкIэ и Министерствэ цIыфхэм къяджэ амышIэхэрэм цыхьэ афамышIынэу, сакъыныгъэ къызхагъэфэнэу.
Зыщышъумыгъэгъупш! «Щынэгъончъэ счетэу» гъэпцIакIохэм зигугъу ашIырэр пцIы.