Адыгэ Республикэм и Лъэпкъ тхылъеджапIэ къэгъэлъэгъонэу «Мы вам завещали жить…» зыфиIоу, шъолъырым иусэкIо-тхакIохэу 1941 — 1945-рэ илъэсхэм щыIэгъэ Хэгъэгу зэошхом хэлэжьагъэхэм афэ­гъэхьыгъэм илъэтегъэуцо щыкIуагъ.

Ащ Адыгеим илитератор 30-мэ япорт­ретхэр хэхьагъэх, ахэр зэо гъогу къур­пэнхэр изыкIукIыгъэх ыкIи зэо гуи­мыкIыжьыр зитворчествэкIэ къизыIотыкIыгъэх. Мы къэгъэлъэгъоныр тарихъ про­ект инэу краеведениемрэ ыкIи лъэпкъ литературэмрэкIэ отделым ылэ­жьэу, ышIэрэм изы Iахь. Проектыр Те­кIоныгъэшхор къыздахыгъэр илъэс 80 зэрэ­хъугъэм ыкIи Хэгъэгум иухъумакIо и Илъэс къыдыхэлъытагъ.
Планшет-къэгъэлъэгъоныр лъигъэкIо­тэщт библиографическэ справочник ушъа­гъэу хэутыным фагъэхьазырырэм. Ащ Адыгеим итхакIохэм ыкIи усакIохэм ящыIэныгъэ, язэо гъогухэр зыфэдагъэхэр ыкIи ежьхэм атхыгъэ произведениехэр къыдэхьащтых.
Зигъо Iофтхьабзэу мы мафэхэм тхылъ­еджапIэм щыIагъэм тхэкIо-фронтовикхэм яунагъохэм ащыщхэр, ягупсэхэр, иеджэпIэ зэфэшъхьафхэм, Мыекъопэ гарнизо­ным идзэ частьхэм ялIыкIохэр ыкIи тхылъеджапIэм иIофышIэхэр хэлэжьагъэх.

ШIэжь къэгъэлъэгъоным илъэтегъэуцо зэрищагъ ыкIи къыриIотыкIыгъ тхылъ­еджапIэм инаучнэ-методическэ отдел иIофышIэ шъхьаIэу Александр Данильченкэм. Адыгеим итхэкIо-фронтовикхэм ТекIоныгъэм яIахь ин зэрэхэлъыр ащ къыриIотыкIыгъ, ятворчествэ, япроизведениехэр къызтегущыIэхэрэр, блэкIыгъэ зэошхом ихьазаб ыкIи зэо хъугъэ-шIагъэхэр къызэрагъэлъэгъуагъэхэм анаIэ цIыфхэм тыраригъэдзагъ.
Лъэтегъэуцом хэлэжьагъэх ыкIи къы­щыгущыIагъэх экономикэ шIэныгъэхэмкIэ докторэу, Советскэ Союзым и ЛIы­хъужъэу Андырхъое Хъусен ипхъорэлъфым ипхъорэлъфыжьэу Хъуажъ Аминэт, къалэу Геленджик и Адыгэ Хасэ хэтхэм янахьыжъэу, тхэкIо-фронтовикэу Лъэустэн Юсыф иIахьыл дэдэу Лъэустэн Борис. Ащ тхылъеджапIэм зэхищэгъэ къэгъэлъэгъоным осэшIу фишIыгъ, Хэгъэ­гум паекIэ зэмыблэжьыгъэхэм ацIэ тшIэн ыкIи ялIыгъэ тыкIырыплъын, тарихъ шIэжьыр ухъумэгъэн зэрэфаер кIигъэтхъыгъ.
АР-м и Лъэпкъ тхылъеджапIэ щы­кIогъэ Iофтхьабзэм щыIугъэх тилитератор-фронтовикхэм яусэхэм арылъ орэдхэр. Ахэр къаIуагъэх къалэу Мые­къуапэ искусствэхэмкIэ икIэлэцIыкIу еджапIэу N 1-м щеджэхэрэм ыкIи ­Лъэпкъ тхылъеджапIэм иIофышIэхэм. Лъэтегъэуцом щыIагъэх ыкIи ятворчествэкIэ къагъэбаигъ АР-м изаслуженнэ артисткэу Даутэ Сусаннэрэ АР-м инароднэ артистэу Къумыкъу Щамсудинрэ. Ащ къыIуагъ орэдэу «Те­кIоныгъэм и Маф» зыфиIоу нэпсыбэ зыхэлъ мэфэкIым и Гимн.
Сурэтхэр: АР-м и Лъэпкъ тхылъ­еджапI.