Шъолъыр форумэу «Адыгеим иныбжьыкIэхэр 3.0» зы­фиIорэм кIэлэеджакIохэр, студентхэр, ныбжьыкIэ ор­ганизациехэм, гуфэкIо движениехэм ахэтхэр, Iоф зышIэрэ ныбжьыкIэ 600-м ехъу хэлэжьагъ.

Урысые общественнэ организациеу «НыбжьыкIэхэм я Урысые Союз» зыфиIорэм ишъолъыр къутамэ Iофтхьабзэм кIэщакIо фэхъугъ. Президент грантхэм яфонд яIэпыIэгъоу форумыр илъэсищ хъугъэу зэхащэ.
Iофтхьабзэр мэфэкI шIыкIэм тетэу къызэIуахыгъ. НыбжьыкIэхэм я Урысые Союз и Адыгэ шъолъыр къутамэ итхьаматэу Абрэдж Заур къэзэрэу­гъоигъэхэм шIуфэс къарихыгъ. НыбжьыкIэхэмкIэ мыщ фэдэ Iофтхьабзэхэм мэхьанэшхо зэряIэр къыIуагъ ыкIи илъэс къэс хэлажьэхэрэм япчъагъэ нахьыбэ зэрэхъу­рэр игуапэу къыхи­гъэщыгъ.
НыбжьыкIэхэр общественнэ Iофтхьабзэхэм ахэлэжьэнхэр, гухэлъыкIэхэр яIэнхэр, ахэр щыIэныгъэм щыпхыра­щынхэр пшъэрылъ шъхьаIэу зэряIэр къы­Iуагъ.
Программэм къыдыхэлъытагъэу ныбжьыкIэхэм Iофтхьэбзэ зэфэшъхьафхэр афызэхащагъэх. Лъэныкъо 15-кIэ Iоф ашIагъ. ЯшIэныгъэхэм зэрэхагъэ­хъуагъэм дакIоу агъэчэфыгъэх, мастер-классхэр, тренингхэр, къэралыгъо зэфэшъхьафхэм къарыкIыгъэхэм лек­циехэр афызэхащагъэх. Iофтхьабзэр Адыгэ къэралыгъо университетым щыкIуагъ.

Пэублэм нэIуасэ зыщызэфэхъугъэхэ зэнэкъокъу зэхащагъ, ащ ишIуагъэкIэ нахь зэпэблагъэ хъугъэх. ДжырэкIэ ныб­жьыкIэхэм дунэе хъытыур жъугъэу къызэрэзфагъэфедэрэр къыдалъытэзэ ащ епхыгъэ егъэджэнхэр афызэхаща­гъэх. Ахэм ащыщ Ставрополь краим иныбжьыкIэ тренинг гупчэ итренерэу Мария Хугашвили гущыIэгъу зэрафэ­хъугъэр. Телеграм-каналыр къызэрэз­фэбгъэфедэн плъэкIыщтыр, ащ ишъэфхэр къафиIотагъэх. Джащ фэдэу клипхэр зэрэбгъэуцущтхэр, уисоциальнэ нэкIубгъо кIатхэхэрэр нахьыбэ зэрэпшIыщтым атегущыIагъэх. Ягухэлъхэр мыукIытэхэу къыраIотыкIынхэм, япшъэрылъхэр агъэ­цэкIэнхэм, къэбар зэфэшъхьафхэр гъэшIэгъонэу къыраIотыкIынхэм, куп зэ­хэтхэм Iоф ащашIэным, волонтерствэм фэщэгъэнхэм афэгъэхьыгъэу гущыIэгъу афэхъугъэх.
Джащ фэдэу мастер-класс гъэшIэ­гъонхэр яIагъэх. Кофе IэшIу зэрэбгъэ­жъощтым, щыгъынхэм хэушъхьафыкIыгъэ сурэтхэр атепшIыхьанхэр, дышъэидэм, цым хэшIыкIыгъэ джэгуалъэхэм яшIын, видеохэр гъэшIэгъонэу зэрэтепхыщтхэр къарагъэлъэгъугъэх. Ащ нэмыкIэу цIыфым апэрэ IэпыIэгъур зэребгъэкIыщтым епхыгъэуи ныбжьыкIэхэм яшIэныгъэхэм ахагъэхъуагъ.
Мэфищым ныбжьыкIэхэм алъэгъугъэр ашIогъэшIэгъоныгъ. Зы унагъо фэдэу зэхэтхэу Iоф ашIагъ. Форумым къыды­хэлъытагъэу ныбжьыкIэхэм я Урысые Союз нэбгыри 115-рэ кIэу хэхьагъ.
МэфэкI шIыкIэм тетэу Iофтхьабзэр зэфашIыжьыгъ, кIэуххэр зэфахьысы­жьыгъэх, зэнэкъокъу зэфэшъхьафхэм анахь дэгъоу закъыщызгъэлъэгъуагъэхэр агъэшIуагъэх. КъэшъокIо купхэу «Мые­къуапэ инэфылъэхэм», «Гуфитым», орэ­дыIо ныбжьыкIэу КIэсэбэжъ Тимур Iофтхьабзэр къагъэбаигъ. Форумыр аухыгъ, ау ар бэрэ джыри агу къэкIыжьыщт.
ДЕЛЭКЪО Анет.