КъэбарышIу, гушIогъошху

«Заор аухыгъ, заор аухыгъ!» —
КъэбарышIум чIылъэр къычъыхьагъ.
ТекIоныгъэр тихэгъэгу къыдихыгъ,
Пый мэхъаджэр ибы рилIыхьагъ.

ТидзэкIолIмэ муары Берлин шъхьагъы
Быракъ Плъыжьыр лъагэу щагъэIагъ,
Дунай нэфым лIыгъэу фызешъухьагъэр
ЧIылъэм щыбыбатэу шъуиIэшIагъ.
МэщбэшIэ Исхьакъ

Хэгъэгу зэошхом иветеранхэу лъытэныгъэ зыфэтшIыхэрэр!
ТичIыпIэгъу лъапIэхэр!
ТекIоныгъэшхом ия 80-рэ илъэскIэ тыгу къыддеIэу тышъуфэгушIо!
1945-рэ илъэсым ижъоныгъуакIэ и 9-р тихэгъэгу илIыхъужъ тарихъ егъэшIэрэу зэрэхэхьагъэр ТекIоныгъэшхо къызыдихыгъэ, цIыф лъэпкъ зэфэшъхьафхэм къа­хэкIыгъэхэм лIыблэнагъэу зэрахьагъэм, шIэжьым ямафэу ары.
ТикъэралыгъокIэ ушэтыпIэ ин дэдэу щытыгъэ Хэгъэгу зэошхом чIэнэгъабэ тигъэшIыгъ, унагъо пэпчъ ар къылъыIэсыгъ, нэбгырэ миллион пчъагъэмэ хьадэгъур къафихьыгъ, нэбгырабэмэ янасып зэпиутыгъ.
Зэрэхэгъэгоу пыим пэуцужьыгъ: фронтым Iутхэр зышъхьамысыжьхэу техакIохэм язэуагъэх, тылым щыIэхэр псэемыблэжьэу заводхэм, фабрикэхэм, колхозхэм, совхозхэм ащылэжьагъэх, нахьыжъхэм тикъэралыгъо къытфагъэгъунагъ, дунаир фашизмэм щаухъумагъ.
Пый мэхъэджэ лъэшым икъызэтегъэуцонрэ изэхэкъутэнрэ къин дэдэу къызэрэтфыдэкIыгъэр тэшIэ. Лажьи-хьакъи зимыIэгъэ нэбгырэ миллион пчъагъэ фашизмэм зэрекIодылIагъэр егъашIи тщыгъупшэщтэп. Тэ типшъэрылъыр текIоныгъэ къытфыдэзыхыгъэ лIэужыр тищысэтехыпIэу тыпсэуныр, тарихъым десэ хэтхыныр, ащ фэдэ тхьамыкIэгъошхо тапэкIэ къэмыхъужьынымкIэ ищыкIэгъэ пстэури тшIэныр ары.
Урысые дзэкIолIхэу, офицерхэу хэушъхьафыкIыгъэ дзэ операцием хэлажьэхэрэм ятэхэр, ятэжъхэр, ятэжъ пIашъэхэр хэбзэ лъапIэхэу зэрыгъозагъэхэр непэ лъагъэкIуатэх — Украинэм инеонацистхэм пхъашэу язаох, Урысыем ифедэхэр къагъэгъунэ.
ТекIоныгъэ къыдэзыхыгъэ лIэужым щысэ тетхызэ, пшъэдэкIыжьышхо зэрэтхьырэр — Хэгъэгу зэошхомкIэ тарихъ шъыпкъагъэр къэтыухъумэн, тикъэралыгъо ищынэгъончъагъэ амыукъоным тыпылъын зэрэфаер икъоу къыдгурэIо!
Заом хэлэжьагъэхэм, иветеранхэм, тылым Iоф щызышIагъэхэм, ТекIоныгъэ­шхор къытфэзыгъэблэгъэгъэ, тикъэралыгъо зэтезыгъэуцожьыгъэ пстэуми лъэшэу тызэрафэразэр къэтэIо.
Шъхьафитыныгъэр къытфэзыухъумэгъэ лIыхъужъхэм щытхъур адэжь! Заом щыфэхыгъэхэм, зидунай зыхъожьыгъэ ветеранхэм лъхъанчэу шъхьащэ афэтэшIы!
ТичIыпIэгъу лъапIэхэр, псауныгъэ пытэрэ щыIэкIэшIурэ шъуиIэнэу, насыпрэ гушIуагъорэ шъуащымыкIэнэу тыгу къыддеIэу тышъуфэлъаIо! ТекIоныгъэшхом ия 80-рэ илъэс Урысые Федерацием хэхъоныгъэшхо езыгъэшIыщт Iофхэм шъуа­тырырегъэгушху!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу
КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу
Владимир Нарожнэр