Хэгъэгу зэошхом ТекIоныгъэр къызыщыдахыгъэр илъэс 80 зэрэхъурэм фэгъэхьыгъэ шы­гъачъэ Мыекъуапэ щыкIуагъ. Адыгеим и ЛIышъхьэу КъумпIыл Муратрэ Ингушетием ипащэу Махмуд-Али Калиматовымрэ ащ еплъыгъэх.

АР-м физическэ культурэмкIэ ыкIи спортымкIэ и Комитет кIэщакIо зыфэхъу­гъэ Iофтхьабзэм ишIухьафтын фонд сомэ миллиони 2 хъущтыгъ.
Шы лъэпкъышIухэм атес шыухэр гъо­гуони 6-мэ ащызэнэкъокъугъэх. Ахэр лъэныкъо гъэнэфагъэхэм ыкIи лIы­хъужъхэм афэгъэхьыгъагъэх: Урысыем и ЛIыхъужъхэр, хэгъэгум иухъумакIохэр, Адыгеим нэмыц-фашист техакIохэр рафыжьыхи шъхьафит зашIыжьыгъэр, ТекIоныгъэм и Маф, Хэгъэгу зэошхомрэ IофшIэнымрэ яветеранхэр, Адыгеим щыщхэу хэушъхьафыкIыгъэ дзэ
операцием хэлажьэхэрэр. Гъогууанэр метрэ 1200-м щегъэжьагъэу 2000-м нэсы­щтыгъ.
— ТекIоныгъэм ия 80-рэ илъэсрэ хэгъэгум иухъумакIо и Илъэсрэ шы­гъа­чъэр афэгъэхьыгъ. Мыщ джыри зэ тыгу къегъэкIыжьы Хэгъэгу зэошхом илъэ­хъан тицIыфхэм лIыхъужъныгъэу зэрахьа­гъэр, хэушъхьафыкIыгъэ дзэ операцием хэла­жьэхэрэм непэ ар зэрэлъагъэкIуатэрэр. Заом къэбар шъыпкъэу пылъыр алъыд­гъэIэсыным, тарихъ шIэжьыр къэтыу­хъу­мэным ыкIи къыткIэхъухьэрэ лIэужхэм ядгъэшIэным мэхьанэшхо иI, — къы­Iуагъ Адыгеим и ЛIышъхьэ.

Шы спорт Iофтхьабзэм ишIухьафтын анахь инэу сомэ миллион хъурэр яплIэнэрэ къызэдэчъэгъум илъыгъ, адрэ­хэм текIоныгъэр къащыдэзыхы­гъэхэм сомэ мин 200 зырыз аратыгъ. Лъэныкъо зэфэшъхьафхэмкIэ анахь дэгъугъэх: шэу Славер (зиер Кубэщыч Анзор), Филиал (Руфина Акбаевар), Зафранция (пшъэ­дэкIыжьэу ыхьырэмкIэ гъунэпкъэ гъэ­нэфагъэ зиIэ обществэу «Агро-галан»), Мэйстрим (зэ­Iухыгъэ Iахьзэхэлъ об­ществэу шы заво­дэу «Волгоградскэр»), Бармалей (Эдуард Мордухович) ыкIи Вендетта (Юрий Крас­нокутскэр).
Iофтхьабзэм къыдыхэлъытагъэу обществэу «Шыу Хасэм» шы лъэпкъ зэ­фэшъхьафхэм япарад ыкIи якъэгъэлъэгъон ригъэкIокIыгъ. ХьакIэхэм зызщагъэпсэфын, кIэлэцIыкIухэр зыщыджэ­гунхэ алъэкIыщт чIыпIэхэри щыIагъэх. Джащ фэдэу IэпэIасэхэм яIофшIагъэхэр къыз­щагъэлъэгъогъэ ермэлыкъ зэхащагъ.­